პოლიციელებზე თავდასხმის ბრალდებით დაკავებულ მათე დევიძეს პატიმრობა შეეფარდა

პოლიციელებზე თავდასხმის ბრალდებით დაკავებულ მათე დევიძეს სასამართლომ აღკვეთის ღონისძიების სახით პატიმრობა შეუფარდა. გადაწყვეტილება მოსამართლემ ცოტა ხნის წინ გამოაცხადა.

საქმეზე შემდეგი სასამართლო სხდომა 2025 წლის 16 იანვარს ჩაინიშნა.

მათე დევიძეს პროკურატურამ ბრალდება სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარუდგინა, რაც 4-დან 7-წლამდე პატიმრობას გულისხმობს.

შსს ირწმუნება, რომ 19 ნოემბერს, თბილისში, მელიქიშვილის გამზირზე გამართულ საპროტესტო აქციაზე, ფიზიკური შეურაცხყოფა მიაყენა ადგილზე საზოგადოებრივი წესრიგის დაცვის მიზნით მობილიზებულ სამართალდამცველებს. კერძოდ, აქციის მიმდინარეობისას, იგი თავს დაესხა პოლიციელებს და ჯოხის დარტყმით სხეულის დაზიანება მიაყენა.

პოლიციამ ის 21 ნოემბერს დააკავა.