ომბუდსმენთან არსებული ეთნიკურ უმცირესობების საბჭოს წევრები და ორგანიზაციები ტოვებენ

სახალხო დამცველთან არსებული ეთნიკური უმცირესობების საბჭოს წევრი და წინამდებარე განცხადებაზე ხელმომწერი ორგანიზაციები აღნიშნულ საბჭოს ტოვებენ. მათივე განცხადებით, ქვეყანაში შექმნილი კრიზისული მდგომარეობა საბჭოს საქმიანობაზე აისახა.

განცხადების თანახმად, ეთნიკური უმცირესობების საჭიროებებზე მუშაობისთვის საბჭოს საქმიანობა ბოლო ერთი წლის განმავლობაში ჩიხში შევიდა.

საბჭოს წევრი ორგანიზაციების თქმით, რუსული კანონის წინააღმდეგ საბჭოს მიერ გავრცელებულ განცხადებას საბჭოს კოორდინატორის მხრიდან უხეში ჩარევა მოჰყვა.

"სახალხო დამცველთან არსებული ეთნიკური უმცირესობების საბჭო, რომელსაც კოორდინაციას უწევს ტოლერანტობის ცენტრი, წლების განმავლობაში წარმოადგენდა მნიშვნელოვან პლატფორმას სამოქალაქო ინტეგრაციის საკითხების განსახილველად და ეთნიკური უმცირესობების საჭიროებებზე სამუშაოდ, თუმცა ბოლო ერთი წლის განმავლობაში საბჭოს საქმიანობა ჩიხში შევიდა.

ქვეყანაში შექმნილი კრიზისული ვითარება, პირდაპირ აისახა აღნიშნული საბჭოს საქმიანობაზე, რომელიც არ/ვერ ასრულებს მასზე დაკისრებულ პასუხისმგებლობას. ბოლო ათი თვის განმავლობაში არ გამართულა არც ერთი სამუშაო შეხვედრა, მიუხედავად საბჭოს სხვადასხვა წევრის არაერთი მოთხოვნისა.

ე.წ. გამჭვირვალობის (რუსული) კანონის წინააღმდეგ საბჭოს მიერ გავრცელებულ განცხადებას მოჰყვა საბჭოს კოორდინატორის, კობა ჩოფლიანის მხრიდან საბჭოს საქმიანობაში უხეში ჩარევა, საბჭოს წინააღმდეგ მისი სახელით გავრცელდა ხელმომწერებისთვის შეურაცხმყოფელი და ცილისმწამებლური განცხადება; ასევე, ჩვენთვის ცხადი გახდა, რომ მას და იზაბელა ოსიპოვას, საბჭოს წევრებთან და ტოლერანტობის ცენტრის ხელმძღვანელთან შეუთანხმებლად, სურთ საბჭოს საქმიანობის წარმართვა", - წერია განცხადებაში.

განცხადებაში ვკითხულობთ, რომ კოორდინატორების მხრიდან კრიტიკული და განსხვავებული აზრი იდევნება და ისინი თავად წყვეტენ ამა თუ იმ საბჭოს წევრს შეხვედრასა და ღონისძიებაზე მიიწვევენ თუ არა.

"აგრეთვე საბჭოს შიგნით კოორდინატორების მხრიდან იდევნება კრიტიკული და განსხვავებული აზრი, ისინი პირადად წყვეტენ რომელ საბჭოს წევრს მიიწვევენ ამა თუ იმ შეხვედრასა თუ ღონისძიებაზე, რაც პირდაპირ ეწინააღმდეგება აღნიშნული საბჭოს პრინციპებსა და ეთნიკური უმცირესობების ინტერესებს. აქედან გამომდინარე საბჭოში შემავალმა ორგანიზაციების თუ ფიზიკურმა პირების ერთმა ნაწილმა, რომლებიც წარმოადგენენ ქვეყნის სხვადასხვა ეთნიკურ უმცირესობებს, მიიღეს ერთობლივი გადაწყვეტილება - ერთი მხრივ, უფუნქციო საბჭოს დატოვების თაობაზე, ხოლო მეორე მხრივ, ახალი - ეთნიკური მრავალფეროვნების - საბჭოს დაარსებაზე.

ეთნიკური მრავალფეროვნების საბჭოში შემავალ ყველა სუბიექტს აქვს სურვილი, რომ მათი საქმიანობა რეალურად ასახავდეს ქვეყანაში მცხოვრები ეთნიკური უმცირესობების საჭიროებებს, საზოგადოებას აწვდიდეს ამომწურავ ინფორმაციას ეთნიკური უმცირესობების წინაშე არსებული გამოწვევების შესახებ, აჟღერებდეს მათ სათქმელს სხვადასხვა ფორუმისა თუ პლატფორმის გამოყენებით და მუშაობდეს ადგილობრივი თემების პრობლემების მოგვარებაზე; აგრეთვე, ხელს უწყობდეს ქვეყნის ეთნიკური მრავალფეროვნების ისტორიის გადააზრებას, თანასწორობის პრინციპების დამკვიდრებასა და გამყარებას.

1. ელნურ ალისოი - სოლიდარობის მოძრაობა.

2. ზაზა კალაშოვი - ქუთული ორგანიაზაცია რონაი.

3. რაშან ზიადალიევი - სამოქალაქო ჩართულობისა და აქტივიზმის ცენტრი.

4. ჯეიხუნ მუჰამედალი - წითელი ხიდი.

5. ალექსანდრე ქავთარაძე - საქართველოს უდიები.

6. სამირა ისმაილოვა - სამოქალაქო თანასწორობის პლატფორმა

7. გიორგი ტუმასიანი - საქართველოს სომხური სათემო პლატფორმა", - ნათქვამია განცხადებაში.