ნაცვლიშვილი რამიშვილზე: ის ცდილობს შური იძიოს თათიაზე, რომელმაც გაბედა და ხმა აიმაღლა
პარტია ლელო საქართველოსთვის წევრი, ანა ნაცვლიშვილი თათია სამხარაძის წინააღმდეგ აგორებულ კამპანიასა და POSTV-ის მიერ მოწყობილ პროვოკაციას ეხმაურება.
ნაცვლიშვილის თქმით, POSTV-ის ხელმძღვანელი, შალვა რამიშვილი ცდილობს შური იძიოს თათია სამხარაძეზე, რომელმაც რამიშვილს სასამართლო დავა მოუგო.
"თავისი ე.წ. ტელევიზიის მეშვეობით და სამწუხაროდ, ამაში ჩართულია სახელმწიფო ინსტიტუციები, ის [რამიშვილი] ცდილობს შური იძიოს თათიაზე, რომელმაც გაბედა და ხმა აიმაღლა, სასამართლო დავა მოუგო მას. ეს არის ცალკე დარღვევა, კიდევ დამატებით დარღვევა კანონმდებლობის, როდესაც მოძალადე, შემვიწროებელი იწყებს მსხვერპლის დევნას, რომ დასაჯოს ის. ამიტომაც, ამ ვითარებაში, განსაკუთრებით მნიშვნელოვანია, როგორ მოიქცევა საზოგადოება, როგორ მოიქცევა სახელმწიფო", - თქვა ნაცვლიშვილმა.
112-ში პროპაგანდისტული ტელევიზიის, POSTV-ის მიერ განხორციელებული ცრუ შეტყობინების გამო 24 მარტს, გვიან ღამით ნაციონალური მოძრაობის წევრის, დიმა ჩიქოვანის საცხოვრებელ სახლში პოლიცია მივიდა და საგამოძიებო მოქმედებები ჩაატარა.
უწყებაში POSTV-ის პროპაგანდისტმა, ნათია ბერიძემ დარეკა და განაცხადა, რომ ჩიქოვანმა, სავარაუდოდ, თათია სამხარაძე გაიტაცა. პოლიციელებმა დანაშაული ვერ დაადგინეს - ენმ-ის გენერალურმა მდივანმა, პეტრე ცისკარიშვილმა განაცხადა, რომ ეს იყო ცრუ დასმენა და ოპოზიციონერი პოლიტიკოსის, დიმა ჩიქოვანის მიმართ მოწყობილი შეგნებული პროვოკაცია.
თათია სამხარაძე ერთ-ერთია, ვინც POSTV-ის ხელმძღვანელი, შალვა რამიშვილი სექსუალურ შევიწროებაში ამხილა. მან რამიშვილს ტელეკომპანია იმედში ყოფნის დროს, 2016 წელს უჩივლა. 2018 წლის 3 იანვარს შალვა რამიშვილს სექსუალური შევიწროების საქმეზე საქალაქო სასამართლომ მორალური ზიანის ასანაზღაურებლად 2 000-ლარიანი ჯარიმა დააკისრა. რამიშვილმა პირველი ინსტანციის გადაწყვეტილება სააპელაციო სასამართლოში გაასაჩივრა, თუმცა მოსამართლემ საქალაქო სასამართლოს გადაწყვეტილება ძალაში დატოვა. ორი ინსტანციის გადაწყვეტილება რამიშვილს უზენაეს სასამართლოში აღარ გაუსაჩივრებია.
ბოლო დღეების განმავლობაში რამიშვილი სექსუალურ შევიწროებაში კიდევ რამდენიმე ქალმა ამხილა. მათი ისტორიები მსგავსია. როგორც ქალები ამბობენ, ისინი გასაუბრების დროს შეავიწროვეს. სექსუალური შევიწროების ბრალდებებს უარყოფს შალვა რამიშვილი.
