მთავრობის ადმინისტრაცია: უკმაყოფილო ვართ გერმანიასთან არსებული ურთიერთობის დონით
მთავრობის ადმინისტრაცია გერმანიის ელჩ, პიტერ ფიშერის დაბარებასთან დაკავშირებით განცხადებას ავრცელებს.
ივანიშვილის მთავრობა ამბობს, რომ უკმაყოფილოა გერმანიასთან არსებული ურთიერთობის დონით და "იმედოვნებს" რომ ვითარება შეიცვლება.
ადმინისტრაციაში ასევე აცხადებენ, რომ ფიშერმა მათ სთხოვა დაუშვას გამონაკლისი გერმანული ორგანიზაციების მიერ ქართული არასამთავრობო ორგანიზაციებისთვის გაცემული გრანტების შეთანხმების მიმართულებით.
"საქართველოს მთავრობის ადმინისტრაციის უფროსი ლევან ჟორჟოლიანი გერმანიის ფედერაციული რესპუბლიკის საგანგებო და სრულუფლებიან ელჩს საქართველოში, პეტერ ფიშერს შეხვდა.
შეხვედრაზე ორ ქვეყანას შორის ურთიერთობების ბოლო პერიოდის დინამიკა განიხილეს. აღინიშნა, რომ საქართველოს მთავრობა არ არის კმაყოფილი ორ ქვეყანას შორის დღეს არსებული ურთიერთობების დონით და იმედოვნებს, რომ ვითარება შეიცვლება.
საუბარი შეეხო საქართველოს საგარეო საქმეთა სამინისტროში დიპლომატის დაბარებას. აღინიშნა, რომ ეს დიპლომატიური ზომა შესაბამის წინაპირობებს ეფუძნებოდა. მთავრობის ადმინისტრაციის უფროსმა განაცხადა, რომ საქართველოს მთავრობა დიდ მნიშვნელობას ანიჭებს პარტნიორ ქვეყნებთან ურთიერთობებს და იმედოვნებს, რომ დიპლომატიური წარმომადგენლების საქმიანობა ურთიერთპატივისცემაზე დაფუძნებული თანამშრომლობის პრინციპების შესაბამისად გაგრძელდება", - წერს ადმინისტრაცია.
