მიშა მშვილდაძე სპეციალურ საგამოძიებო სამსახურში გამოკითხვაზე დაიბარეს
ფორმულას ერთ-ერთი დამფუძნებელი, მიშა მშვილდაძე მასზე განხორციელებული თავდასხმის საქმეზე სპეციალურ საგამოძიებო სამსახურში გამოკითხვაზე დაიბარეს.
გამოკითხვაზე შესვლამდე მიშა მშვილდაძემ თქვა, რომ საგამოძიებო სამსახურს თავისივე კამერების ჩანაწერების ამოღებაც შეუძლია, რადგან უწყების შენობა მდებარეობს ასათიანის ქუჩაზე, სადაც თავდასხმის დღეს გადაადგილდებოდნენ მანქანები, რომლებიც თავდასხმაში ფიგურირებენ.
"დასაწყისია და პირველი შეხვედრაა და იმედს ვიქონიებ, რომ ყველაფერს გამოიძიებს. ტესტი იქნება ძალიან მარტივი. აქ აყენია კამერები, თავისივე კამერაა და აქედან უნდა დაიწყონ კამერების ამოღება - დღესვე და ამ წამს. ეს იქნება პირველი ტესტი, რას მეტყვიან კამერების ამოღებაზე. ვერ ვიტყვით, რომ იჩქარეს ამ საქმეში ჩართვა, მაგრამ ახლა ჩართულები არიან და იმედი მაქვს, რომ არცერთი საგამოძიებო მოქმედების ჩატარება არ იქნება დაგვიანებული იმიტომ, რომ ასეთ შემთხვევაში ამ უწყების პასუხისმგებლობა დგება"- თქვა მშვილდაძემ.
მიშა მშვილდაძეზე თავდასხმის საქმე შსს-ს წარმოებიდან ამოიღეს და გამოსაძიებლად სპეციალურ საგამოძიებო სამსახურს გადაეცა.
ფორმულას ერთ-ერთ დამფუძნებელზე, მიშა მშვილდაძეზე ორგანიზებული თავდასხმის ერთ-ერთი ფიგურანტი სახელმწიფო უსაფრთხოების სამსახურის გამომძიებელი გიორგი მუმლაძეა.
ფორმულამ გაარკვია, რომ მუმლაძე დაბადებულია 1998 წელს, მუშაობდა შსს-ში, რამდენიმე თვეა რაც სუს-ის ქალაქის სამმართველოს გამომძიებლად გადაიყვანა ლევან ახობაძემ, რომელიც 2022 წლიდან სუს-ის უფროსის მოადგილის თანამდებობას იკავებს.
ფორმულას ერთ-ერთ დამფუძნებელს, მიშა მშვილდაძეს 27 ივნისს უცნობი პირი თავს დაესხა და ფიზიკურად გაუსწორდა. შსს-მ გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.
28 ივნისს სოციალურ ქსელში მოქალაქე ნიკოლოზ გუგეშაშვილმა დაწერა, რომ გუშინ 27 ივნისს ფორმულას ერთ-ერთ დამფუძნებელს მიშა მშვილდაძეს თავს ის დაესხა.
გუგეშაშვილის თქმით, თავდასხმის მიზეზი ისაა, რომ მშვილდაძე "ეკლესიას მოიხსენიებს კრიმინალად და იძახის, რომ ჯვარი არის ძალადობის სიმბოლო, აგინებს პატრიარქს, ქართველ ერს და იცავს მამათმავლებს".
ამავე დღეს მიშა მშვილდაძეზე თავდასხმის ბრალდებით ერთი ადამიანი დააკავეს.
29 ივნისს, კი მიშა მშვილდაძეს მასზე თავდასხმიდან მესამე დღეს დაზარალებულის სტატუსი ოფიციალურად მიენიჭა.
თავდასხმა მშვილდაძემ დეტალურად გადაცემაში პოლიტმეტრი გაიხსენა.
ეს შემთხვევა ჰგავს ზურაბ ჯაფარიძეზე თავდასხმას, როცა ასევე სოციალურ ქსელში კონკრეტულმა ადამიანმა, სოსო მაისურაძემ მსგავსი შინაარსის და სტრუქტურის აღიარებითი პოსტი დაწერა და ოპოზიციონერზე თავდასხმა რელიგიისა და პატრიარქის დაცვის მოტივით გაამართლა.
ზურაბ ჯაფარიძეზე თავდასხმის შესახებ ფორმულას წყარომ მიაწოდა ინფორმაცია, რომ თავდასხმა სუს-ის შიდა ქართლის სამმართველოში დაიგეგმა.
წყაროს ცნობით, სუს-ის მონაწილეობით შექმნილი სცენარის მიხედვით, შეირჩა პარტია გირჩი - მეტი თავისუფლების ლიდერზე თავდამსხმელი, რომელიც მომხდარზე პასუხისმგებლობას აიღებდა.
