მედიის წარმომადგენლებზე ძალადობის გამო მედიაომბუდსმენი საგამოძიებო სამსახურს მიმართავს
ჟურნალისტებისა და ოპერატორების დევნისა და დაკავების გამო ორგანიზაცია მედიაომბუსმენმა სპეციალურ საგამოძიებო სამსახურს მიმართა.
დღეს, 19 ნოემბერს გამთენიისას პოლიციამ და სპეციალური დანიშნულების რაზმმა ჭავჭავაძის გამზირზე, თსუ-ის მიმდებარედ უწყვეტის საპროტესტო აქციის დაშლა დაიწყო. პოლიცია აქციის მონაწილეების მიმართ აგრესიას იჩენდა და ფიზიკურადაც ძალადობდა.
მედიაომბუდსმენი მედიის წარმომადგენლებზე ძალადობის რამდენიმე შემთხვევის შესახებ ინფორმაციას ავრცელებს:
- სპეცდანიშნულების წევრები ჟურნალისტურ საქმიანობაში ხელს უშლიდნენ OC Media ჟურნალისტს მარიამ ნიკურაძეს.
- სამართალდამცველები გადაღების შესაძლებლობას არ აძლევდნენ Netgazeti-ს კორესპონდენტს გივი ავალიანს
- ჟურნალისტური საქმიანობის შესრულების პროცესში დააკავეს მთავარი არხის ოპერატორი სერგი ბარამიძე
- სამართალდამცველებმა ფიზიკური შეურაცხყოფა მიაყენეს პუბლიკას ჟურნალისტს მინდია გაბაძეს
მედიაომბუდსმენი შინაგან საქმეთა სამინისტროს მოუწოდებს, მედიასა და აქციის მონაწილეებზე ძალადობა შეაჩეროს.
