ხაზარაძე: სხდომაზე წარვადგინეთ მკაფიო არგუმენტები, რატომ არ მივედი არალეგიტიმურ კომისიაში

ძლიერი საქართველოს ლიდერის მამუკა ხაზარაძის თქმით, რომელსაც ცოტა ხნის წინ სასამართლომ 50 000-ლარიანი გირაო შეუფარდა, სხდომაზე წარადგინა მკაფიო არგუმენტები, თუ რატომ არ მივიდა არალეგიტიმური პარლამენტის არალეგიტიმურ კომისიაზე და აღნიშნა, რომ ეს მისი მხრიდან შეგნებული ნაბიჯია.

სხდომის დასრულების შემდეგ მან ჟურნალისტებთან თქვა, რომ არ აღიარებს არალეგიტიმურ პარლამენტს. ამასთან, მამუკა ხაზარაძის თქმით, მის მიმართ პიროვნული დისკრედიტაციის მცდელობის სხვადასხვა მოგონილი საქმეებიდან გამომდინარე, მზად არის, სასამართლოში გასცეს კვალიფიციური პასუხი არსებულ აბსურდულ კითხვებს.

"ჩვენ სხდომაზე წარვადგინეთ ძალიან მკაფიოდ ის არგუმენტები, თუ რატომ არ მივედი, ეს არმისვლა იყო შეგნებული, ამის შესახებ იქნა ცნობილი პროკურატურისთვის, სასამართლოსთვის, რომ ჩემი არგამოცხადება არალეგიტიმურ პარლამენტში, შესაბამისად, მის მიერ შექმნილ არალეგიტიმურ კომისიაში ჩემი შეგნებული ნაბიჯია. ამავე დროს დაისვა კითხვა, შესწავლილი იქნა თუ არა არალეგიტიმურობა ამ კომისიისა, როცა პროკურატურამ დაიწყო ჩემს წინააღმდეგ ბრალის წაყენების გამოძიება, რა თქმა უნდა, ამაზე პასუხი არ აქვთ.

კიდევ ერთხელ მინდა დავაფიქსირო ფართო საზოგადოებისთვის ორი რამ - არ ვაღიარებ არალეგიტიმურ პარლამენტს, ისევე როგორც მის შექმნილ კომისიას, ისევე როგორც არ აღიარებს ამ არალეგიტიმურ პარლამენტს მსოფლიოს ცივილური სამყარო, დემოკრატიული ქვეყნები. ეს არის ჩემი ურყევი პროტესტი და ეს პროტესტი იქნება მყარი, არანაირი და ვერანაირი გადაწყვეტილება მე ამ რწმენას ვერ შემაცვლევინებს, ეს განვუცხადე მოსამართლეს.

რაც შეეხება მეორე საკითხს - ეს ეხება იმას, რომ ბოლო 5 წლის განმავლობაში, რაც მე პოლიტიკაში შემოვედი, ქართული ოცნების მხრიდან მიმდინარეობს ჩემი პიროვნული დისკრედიტაციის მცდელობა სხვადასხვა მოგონილი საქმეებიდან გამომდინარე, ესეც განვაცხადე სასამართლოში, რომ მიუხედავად იმისა, ჩემი ბიზნესში მონაწილეობის 30 წლის განმავლობაში, არცერთი საქმე არ ყოფილა ჩემს წინააღმდეგ ან საჩივარი, ან რამე გარჩევა, მზად ვარ, მიუხედავად იმისა, რომ 14-15 წლის წინანდელ აბსურდულ ზღაპრებს ჰყვებიან, მზად ვარ, ამ სასამართლოში გავცე კვალიფიციური პასუხი, თუ რაიმე არსებობს", - თქვა მამუკა ხაზარაძემ.

სასამართლომ ძლიერი საქართველოს ლიდერ მამუკა ხაზარაძეს არალეგიტიმურ პარლამენტში შექმნილ საგამოძიებო კომისიაზე არმისვლის გამო აღკვეთის ღონისძიების სახით 50 000-ლარიანი გირაო შეუფარდა, გადაწყვეტილება მოსამართლემ რამდენიმე წუთის წინ გამოაცხადა.

პროკურატურამ ძლიერი საქართველოს ლიდერს მამუკა ხაზარაძეს ბრალი წაუყენა საქართველოს სისხლის სამართლის კოდექსის 349-ე მუხლით, რომელიც ქართული ოცნების პარლამენტის დროებითი საგამოძიებო კომისიის მოთხოვნის შეუსრულებლობას შეეხება.

მამუკა ხაზარაძე ბრალდებას პოლიტიკურ დევნად აფასებს და აცხადებს, რომ არ ცნობს არც პარლამენტს და არც საგამოძიებო კომისიას, რომელსაც ანტიეროვნული უწოდა.

ქართული ოცნების არალეგიტიმური, ერთპარტიული პარლამენტის საგამოძიებო კომისიაზე გამოუცხადებლობა სისხლის სამართლის კოდექსით დასჯადი ქმედებაა და ერთ წლამდე თავისუფლების აღკვეთას ან ჯარიმას ითვალისწინებს.