ილიაუნის სტუდენტური მოძრაობა: ორშაბათს ვიფიცებით, მოვუწოდებთ სხვებსაც, შემოგვიერთდნენ

ილიაუნის სტუდენტური მოძრაობის წევრები აცხადებენ, რომ ორშაბათს, 2 ივნისს, მთელი დღის განმავლობაში გაფიცულები იქნებიან. ისინი ლექტორ-მასწავლებლებსა და სხვა უნივერსიტეტის სტუდენტებს მოუწოდებენ, შეუერთდნენ.

"ორშაბათს მთელი დღის განმავლობაში ვიფიცებით ილიაუნის სტუდენტები! მოვუწოდებთ ჩვენს ლექტორ-მასწავლებლებსა და სხვა უნივერსიტეტის სტუდენტებს, შემოგვიერთდნენ!

დღის თორმეტი საათიდან ჩვენ ვიქნებით ილიაუნის ა კორპუსის წინ და ველოდებით ყველას, ვისაც დაკავებული სტუდენტებისთვის სოლიდარობის გამოცხადებისა და გამხნევების სურვილი გაქვთ!

ძირს რუსეთის დამპალი იმპერია!", - ვკითხულობთ განცხადებაში.

არალეგიტიმური პარლამენტის დეპუტატის, მარიამ ლაშხის საჩივრის საფუძველზე აქტივისტს, თათია აფრიამაშვილს 12-დღიანი პატიმრობა შეეფარდა. ამავე საქმეზე ლიკა ლორთქიფანიძეს 12-დღიანი პატიმრობა შეეფარდა, მაგდა მამუკაშვილს კი 4 000-ლარიანი ჯარიმა.

შემთხვევა 17 მაისს მოხდა. 3 აქტივისტს მარიამ ლაშხმა უჩივლა. მისი მტკიცებით, აქტივისტებმა მას შეურაცხყოფა მიაყენეს.