კალასმა რუსეთის წინააღმდეგ სანქციების სამომავლო პაკეტის შესაძლო ელემენტები დაასახელა
ევროკავშირის საგარეო საქმეთა მინისტრებმა არაფორმალურ შეხვედრაზე უკრაინის საკითხი და რუსეთზე ზეწოლის გაძლიერების გზები განიხილეს. შეხვედრის დასრულების შემდეგ ევროკავშირის უმაღლესმა წარმომადგენელმა, კაია კალასმა განაცხადა, რომ ყველა წევრი ქვეყანა მხარს უჭერს დიპლომატიურ ძალისხმევას ომის დასასრულებლად, თუმცა რუსეთი „მშვიდობისთვის კი არა, უფრო მეტი ომისთვის ემზადება“.
კალასის თქმით, მინისტრებმა იმსჯელეს სანქციების ახალ პაკეტზე, რომელიც შეიძლება მოიცავდეს მეორად სანქციებს რუსეთის მხარდამჭერთა წინააღმდეგ, რუსული პროდუქციის იმპორტის აკრძალვას, ტარიფებს და „ჩრდილოვანი ფლოტის“ წინააღმდეგ დამატებით ზომებს.
მისივე თქმით, განხილვის ერთ-ერთი თემა იყო გაყინული რუსული აქტივების გამოყენება უკრაინის თავდაცვისა და რეკონსტრუქციისთვის: „წარმოუდგენელია, რომ რუსეთმა ოდესმე კვლავ დაინახოს ეს ფული, თუ სრულად არ აანაზღაურებს უკრაინისთვის მიყენებულ ზიანს“.
