ჰაგარი: ჰამასის თავდასხმის წლისთავთან დაკავშირებით, ხვალ ტერაქტების მცდელობებია მოსალოდნელი

თავდაცვის ძალების სპიკერის, დანიელ ჰაგარის განცხადებით, ისრაელზე დაჯგუფება ჰამასის მიერ თავდასხმის წლისთავთან დაკავშირებით, ტერორისტული აქტების მცდელობებია მოსალოდნელი, რის გამოც თელავივი მზადყოფნაშია.

როგორც ჰაგარიმ აღნიშნა, 7 ოქტომბრის მოახლოებასთან ერთად ისრაელის თავდაცვის ძალებმა პოზიციები გააძლიერა და ყველა დანაყოფთან მუდმივ კონტაქტზეა.

"მზად ვართ ჩვენი გაძლიერებული ჯარით, რადგან სავარაუდოდ, ამ თარიღისთვის განხორციელდება ტერორისტული თავდასხმების მცდელობა", - თქვა ჰაგარიმ.

***

2023 წლის 7 ოქტომბერს ტერორისტული ორგანიზაცია ჰამასი ისრაელს თავს დაესხა. თავდასხმის შემდეგ ჰამასის მებრძოლებმა მძევლები აიყვანეს და ღაზის ტერიტორიაზე გადაიყვანეს. ორგანიზაციას მძევლად 200-250 ადამიანი ჰყავდა, მათ შორის იყვნენ როგორც ისრაელის, ისე სხვა ქვეყნის მოქალაქეები. მძევლებს შორის იყვნენ ბავშვები და მოხუცები. ქვეყნის მასშტაბით განგაშის სირენები იყო ამოქმედებული. მაშინ ჰამასმა თქვა, რომ 20 წუთში 5 000 რაკეტა გამოიყენეს.

ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.

ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.

სხვადასხვა მონაცემებით დაღუპულია 1000-ზე მეტი ადამიანი.