"გაუტოლდა წამებას, არაადამიანურ, დამამცირებელ მოპყრობას" - NGO-ები აქციის დაშლაზე
არასამთავრობო ორგანიზაციები რუსული კანონის საწინააღმდეგო მშვიდობიანი აქციის დაშლასთან დაკავშირებით აღნიშნავენ, რომ დარბევა და პოლიციელების მიერ გამოყენებული ფიზიკური ძალა გაუტოლდა წამებასა და არაადამიანურ, დამამცირებელ მოპყრობას.
ერთობლივ პრესკონფერენციაზე NGO-ებმის წარმომადგენლებმა აღნიშნეს, რომ აქციის დარბევა უსაფუძვლო იყო.
"შინაგან საქმეთა სამინისტროს მიერ რუსული კანონის საწინააღმდეგო აქციის დარბევა არალეგიტიმური და არაპროპორციული იყო. გამოყენებული ფიზიკური ძალა გაუტოლდა წამებას, არაადამიანურ დამამცირებელ მოპყრობას, ხოლო ადმინისტრაციული დაკავება კვლავ შეკრების თავისუფლების მომეტებული შეზღუდვის ინსტრუმენტად იქცა. აქციის დარბევის შესახებ მიღებული გადაწყვეტილება იყო უკანონო ორი საფუძვლით - არ არსებობდა შესასვლელების ბლოკირების მიზნით დემონსტრანტების დარბევის საფუძველი. ასეთი საფუძვლის არსებობის შემთხვევაში კი, არ არსებობდა მთლიანი აქციის დარბევის წინაპირობა. საპროტესტო აქციის დასაშლელად, როგორც საჯარო წყაროებიდან ირკვევა გამოყენებული იყო ცრემლსადენი გაზი, რეზინის ტყვიები, წიწაკის სპრეი და წყლის ჭავლი. სახელმწიფომ დაარღვია აქტიური სპეციალური საშუალებების გამოყენების წესები"- თქვეს არასამთავრობო ორგანიზაციებმა ერთობლივ პრესკონფერენციაზე.
გუშინ ღამით რუსული კანონის საწინააღმდეგო აქციაზე პოლიციამ მშვიდობიანი მოქალაქეები დაარბია - გამოიყენეს წყლის ჭავლი, წიწაკის სპრეი, ცრემლსადენი გაზი. პოლიციამ იძალადა მოქალაქეებზე. შსს-ს ცნობით, აქციაზე დაკავებულია 63 ადამიანი.
