გალანტი: ისრაელი იქამდე არ დაასრულებს ომს ღაზაში, სანამ ჰამასი არ განადგურდება
ისრაელის თავდაცვის მინისტრის, იოავ გალანტის განცხადებით, ისრაელი იქამდე არ დაასრულებს ომს ღაზაში, სანამ ჰამასი არ განადგურდება.
"ჩვენ მანამ არ დავასრულებთ ომს ღაზაში, სანამ ჰამასი არ განადგურდება. ჰამასი, როგორც [ტერორისტული] დაჯგუფება აღარ იარსებებს. ამას დრო დასჭირდება", - თქვა ისრაელის თავდაცვის მინისტრმა.
7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.
გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.
ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.
ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.
