"ჩემი ხმა ევროკავშირს" - 30-მდე არასამთავრობო ორგანიზაცია სადამკვირვებლო მისიას ქმნის
"ჩემი ხმა ევროკავშირს" - არასამთავრობო ორგანიზაციებმა ახალი სადამკვირვებლო მისია დააფუძნეს. ამ ეტაპზე, პლატფორმა 30-მდე ორგანიზაციას აერთიანებს.
ყოფილი სახალხო დამცველი, ნინო ლომჯარია ფორმულასთან ახალი პლატფორმის მიზნებზე საუბრობს. მისი თქმით, შექმნის იდეა თავად საზოგადოებას გაუჩნდა მაშინ, როცა ქართულმა ოცნებმა რუსული კანონი მიიღო.
"ალბათ, გახსოვთ, რომ მეორე დღესვე უკვე მოქალაქეები საუბრობდნენ იმაზე, რომ ახლა საჭიროა არჩევნების გარშემო მოვბილიზდეთ, დავიცვათ არჩევნებზე ხმები. ყველა კითხულობდა, რომ სად შეიძლება დარესტრირდნენ დამკვირვებლებლად და ა.შ ამიტომ ჩვენ, სამოქალაქო საზოგადოების წარმომადგენლები, 30-მდე არასამთავრობო ორგანიზაცია არის გაერთიანებული ამ ეტაპზე, ამ კოალიციაში - ჩემი ხმა ევროკავშირს - და დღეს წარმოვადგენთ ერთ-ერთ მიმართულებას - ჩემი ხმა. ეს არის სადამკვირვებლო მისიის სახელწოდება, რომელსაც 30-მდე არასამთავრობო ორგანიზაცია ვქმნით", - აღნიშნავს ლომჯარია.
ის ხაზს უსვამს, რომ ეს იქნება საყოველთაო, სახალხო დაკვირვება, სადაც მონაწილეობის მიღებას სურვილის შემთხვევაში, თითოეული მოქალაქე შეძლებს.
"კითხვა, რომ ახლა რა შეგვიძლია, გავაკეთოთ, სწორედ ასეთი ტიპის აქტივობები სცემს პასუხს, რომ ახლა ჩვენ შეგვიძლია დავიცვათ ჩვენი, თქვენი და ყველას ხმები. ჩვენი მიზანი და გეგმაა, რომ ვიყოთ ყველა საარჩევნო უბანზე წარმოდგენილები, 3000-ზე მეტ საარჩევნო უბანზე, მათ შორის, ასევე, საზღვარგარეთ გახსნილ უბნებზე, გვეყოლება მობილური ჯგუფები, გვეყოლებიან დამკვირვებლები ოლქშიც.
მიზანი არის ის, რომ ის დამოკიდებულება, თითქოს არჩევნებამდე უკვე ყველაფერი წყდება და არჩევნების დღე არაფერს ცვლის, ეს არ არის სიმართლე, ეს არის მცდარი წარმოდგენა. არჩევნების მანიპულირება ხდება იქ, სადაც არ არსებობს კვალიფიციური, ობიექტური, ენთუზიაზმით აღსავსე დამკვირვებელი. ხოლო, ძლიერი სამოქალაქო დაკვირვების პირობებში, ასეთი მანიპულაციების პრევენცია ხდება, გამოვლენა ხდება და მინდა, გითხრათ, რომ ჩვენ, ამ კოალიციაში გაერთიანებულ ადამიანებს და ორგანიზაციებს გვაქვს გამოცდილება, როგორც საქართველოში, ასევე, საზღვარგარეთ მსგავს სიტუაციებში დაკვირვების და გვაქვს ცოდნა, თუ რა შეიძლება მოხდეს, როგორ შეიძლება ეს დავაზღვიოთ", - აცხადებს ლომჯარია.
დაინტერესებულმა მოქალაქეებმა უნდა გაიარონ რეგისტრაცია ვებგვერდზე: Wevote.ge, რის შემდეგაც, მათ ორგანიზაციის წარმომადგენლები დაუკავშირდებიან, ჩაუტარდებათ ტრენინგი და სხვადასხვა საარჩევნო უბანსა და ოლქში გადანაწილდებიან.
როგორც ლომჯარია აღნიშნავს, ძალიან მნიშვნელოვანია, რომ სადამკვირვებლო მისიაში მონაწილეობა რეგიონში მცხოვრებმა მოქალაქეებმა მიიღონ.
"ვფიქრობთ, რომ მნიშვნელოვანია, რომ ალბათ, ადგილზე იყვნენ ის ადამიანები დამკვირვებლები, რომლებმაც იციან ადგილობრივი კონტექსტი და გარემო, თუმცა, რა თქმა უნდა, შერჩევა მოხდება მაინც იმის მიხედვით, სად როგორ არის საჭირო. ზოგჯერ ადგილობრივი დამკირვებელია საჭირო, ზოგჯერ შეიძლება სხვა რაიონიდან ან ოლქიდან გადაყვანაა უმჯობესი, ეს მეთოდოლოგიური საკითხია. რაც შეეხება დაკვირვების მიზანს, ძირითადი მაინც არის საარჩევნო უბნის შიგნით დაკვირვება. თუმცა ასევე, გვეყოლებიან მობილური ჯგუფები, რომლებიც იმოძრავებენ ოლქის ტერიტორიაზე და შესაბამისად, მათი ერთ-ერთი ფუნქცია იქნება საარჩევნო უბნის გარეთ არსებული სიტუაციის დაკვირვება. ასევე, გვეყოლებიან დამკვირვებლები საოლქო საარჩევნო კომისიებში, ცესკოში, შესაბამისად, ყველა ასპექტი იქნება დაფარული", - აცხადებს ლომჯარია.
