NCDC-ში იშვიათი დაავადებების საკითხზე მომუშავე საკოორდინაციო საბჭოს სხდომა გაიმართა
დაავადებათა კონტროლის ეროვნულ ცენტრში იშვიათი დაავადებების საკითხზე მომუშავე საკოორდინაციო საბჭოს შეხვედრა გაიმართა. შეხვედრის თემა აქონდროპლაზიას ეხებოდა, კერძოდ, პრეპარატ ვოზორიტიდის დანერგვის ეტაპებს და ამ მიმართულებით, საერთაშორისო გამოცდილებას.
შეხვედრის დასრულების შემდეგ ჯანდაცვის ორგანიზაციის საქართველოს ოფისის წარმომადგენელმა სილვიუ დომენტემ კომენტარი გააკეთა. მან ახსნა, რა ეტაპები უნდა გაიაროს პრეპარატმა იმისათვის, რომ მოხდეს მისი ავტორიზაცია.
"ამ შეხვედრამ კიდევ ერთხელ აჩვენა, როგორი რთული საკითხია, როგორი კომპლექსურია, რამდენი რამ უნდა იყოს გათვალისწინებული და სამწუხაროდ, ჯერჯერობით, მსოფლიოშიც კი მტკიცებულებებზე დაფუძნებული ინფორმაცია შეზღუდულია. რამდენიმე გადაწყვეტილებაა მისაღები, რთული პროცესია, რომ ეს წამალი იყოს რეგულირებული და დამტკიცებული საქართველოში და ამისათვის რამდენიმე ნაბიჯია გასასვლელი, ყოველ შემთხვევაში, უნდა შეფასდეს ამ პრეპარატის კლინიკური ეფექტურობა და სხვა ბევრი მონაცემი იქნება ამისათვის საჭირო.
ვინაიდან სირთულე არის იმაში, რომ ეს არის იშვიათი დაავადება, მონაცემები და ინფორმაცია, თუნდაც იმ ქვეყნებშიც კი, სადაც ეს უკვე დაწყებულია, იქაც კი ძალიან მწირია ჯერჯერობით მოხმარებისთვის. პირველი ნაბიჯი არის ამ პრეპარატის აღიარება ქვეყანაში, მაგრამ ამის შემდეგ არ იქნება დასრულებული პროცესი, შემდეგ დამატებითი ნაბიჯები იქნება გადასადგმელი, რომ ხელმისაწვდომი გახდეს ეს პრეპარატი, უკვე აღიარების შემდეგ. როგორ უნდა იყოს ანაზღაურებული, რა მექანიზმები უნდა იყოს ბიუჯეტიდან, ფონდი უნდა იყოს შექმნილი. ამ დროს, ძალიან ბევრი მომენტი უნდა იყოს გათვალისწინებული, როგორ უნდა გასწვდეს ქვეყანა, რომ ეს ყველაფერი იყოს სწორად გაკეთებული და მოგვარებული.
როგორც ითქვა, ის ფაქტი, რომ ეს პრეპარატი იქნება აღიარებული და მიღებული ქვეყანაში, ეს არ ნიშნავს, რომ უცბად იქნება შესაძლებელი, იყოს ადგილზე და იყოს ხელმისაწვდომი და იყოს ანაზღაურებადი, ეს დანარჩენ სამუშაოსაც მოითხოვს.
ხელისუფლებამ გადადგა 2 მნიშვნელოვანი ნაბიჯი. უპირველეს ყოვლისა, მათ შექმნეს ეს საბჭო იშვიათი დაავადებებისთვის და ამ საბჭომ უნდა გაანალიზოს ყველა ხელმისაწვდომი შედეგი და მიიღოს გადაწყვეტილება კლინიკურ გამოყენებაზე, გამოყენების დადასტურებასა და ასევე მის ანაზღაურებაზე. მეორე მნიშვნელოვანი ნაბიჯია ის, რომ ხელისუფლება იყო მწარმოებელთან მოლაპარაკებების ინიციატორი. თუმცა, ეს მოლაპარაკებები კონფიდენციალურია, ამიტომ არავინ იცის, ვერ ვიტყვი რამდენ დროს წაიღებს ან რა იქნება ამ მოლაპარაკებების შედეგი, მაგრამ მნიშვნელოვანია, რომ ასეთი მოლაპარაკებები დაიწყო", - თქვა ჯანმო-ს წარმომადგენელმა.
ჯანმო-ს წარმომადგენლის თქმით, პროცესი, შესაძლოა, საკმაოდ ხანგრძლივი იყოს. მისი თქმით, მიღებულია გადაწყვეტილება, რომ "ყველა ბავშვი კომპლექსურად გამოიკვლიონ და შესთავაზონ ქირურგიული ან ჰორმონალური მკურნალობა შესაბამისი გართულებებისთვის".
"ეს პროცესი, შესაძლოა, საკმაოდ ხანგრძლივი იყოს. ამის მიუხედავად, ხელისუფლება, საბჭო, ექსპერტები არ დაელოდებიან საბოლოო გადაწყვეტილებას. დღეს მოვისმინეთ, რომ ექსპერტებმა უკვე დაიწყეს ამგვარი მკურნალობების კლინიკურ პროტოკოლზე მუშაობა და ამავდროულად, ამ პროტოკოლის შექმნამდე და მანამ, სანამ ყველა გადაწყვეტილება მიიღება, სამინისტრომ, ხელისუფლებამ და პარლამენტმა განაცხადეს, რომ ამ ყველა ბავშვებს შესთავაზებენ ყველა სხვა საჭირო სერვისს. ეს არაა მხოლოდ სამედიცინო მკურნალობის საკითხი, არის სხვა მკურნალობებიც ხელმისაწვდომი ასევე სხვა ქვეყნებში, მათ შორის ევროკავშირში, აშშ-ში და იაპონიაში - როგორიცაა ქირურგიული მკურნალობა და ჰორმონალური მკურნალობა, მაგრამ ასევე ვუმკურნალებთ ყველა იმ გართულებას რაზეც საუბრობთ. მიღებულ იქნა გადაწყვეტილება, რომ ყველა ეს ბავშვი იქნება კომპლექსურად გამოკვლეული და მათ შევთავაზებთ ყველა ამ მკურნალობას შესაბამისი გართულებებისთვის", - თქვა სილვიუ დომენტემ.
***
აქონდროპლაზიის დიაგნოზის მქონე ბავშვების მშობლები მე-8 დღეა, მთავრობის კანცელარიასთან ღამეს ათევენ - ისინი მოითხოვენ, სახელმწიფომ ბიუჯეტიდან მედიკამენტისთვის საჭირო თანხები გამოყოს, რათა ბავშვებმა მკურნალობა შეძლონ.
19 აპრილს აქონდროპლაზიის დიაგნოზის მქონე ბავშვების მშობლებს ჯანდაცვის მინისტრი ზურაბ აზარაშვილი შეხვდა, თუმცა შეხვედრა მშობლებისთვის უშედეგო აღმოჩნდა. ერთ-ერთმა მშობლემა შეხვედრის დასრულების შემდეგ თქვა, რომ მინისტრი მის მიერ გაკეთებულ განცხადებებში ცრუობს. მისივე თქმით, სხდომაზე არ მიეცათ კონკრეტული კითხვების დასმის შესახლებლობა და მინისტრმა მხოლოდ მისთვის საჭირო შეკითხვებს უპასუხა.
შეხვედრის შემდეგ ზურაბ აზარაშვილმა ჟურნალისტებთან თქვა, რომ მშობლებს დეტალურად გააცნო საკოორდინაციო საბჭოს მიერ მიღებული გადაწყვეტილება. მინისტრი ირწმუნება, რომ არც ერთ ქვეყანაში მედიკამენტ ვოზორიტიდის სახელმწიფო ბიუჯეტიდან დაფინანსება არ ხდება.
აქონდროპლაზია ყველაზე გავრცელებული ფორმაა სკელეტური დისპლაზიისა [ძვლოვანი სტრუქტურის ზრდის შეფერხება, ანომალიური განვითარება].
იგი 40000-ში ერთ ახალშობილს უდგინდება და ხასიათდება კიდურების ზრდის შეფერხებით და იწვევს ხერხემლისა და თავის ქალის ანომალიურ განვითარებას.
მედიკამენტ ვოზორიტიდს შეუძლია დაეხმაროს აქონდროპლაზიის მქონე ადამიანებს. ამ მედიკამენტით ამერიკასა და ევროპაში უკვე სარგებლობენ.
ის ბოჭავს სპეციფიკურ რეცეპტორს, რომელსაც ეწოდება ნატრიურეზული პეპტიდური რეცეპტორ-B, რომელიც ამცირებს ზრდის რეგულაციის გენის აქტივობას და ასტიმულირებს ძვლის ზრდას.
კომპანია BioMarin, რომელმაც შექმნა წამალი ვოზორიტიდი და რომლის მედიკამენტიც VOXZOGO (vosoritide) დადასტურებულია, როგორც ამერიკის სურსათისა და წამლის სააგენტოს (FDA)-ის ასევე ევროკავშირში სამედიცინო პროდუქტების ზედემხედველის - ევროპის მედიცინის სააგენტოს (EMA) მიერ, წამლით 1-წლიანი მკურნალობის საშუალო ფასად 2021 წელს $300 000 დოლარს ასახელებდა.
