Gastronome: ჩვენთვის შექმნილი რძის ნაწარმი 100%-ით ნატურალურია, წარმოების პროცესი კონტროლდება

რადიო თავისუფლების ჟურნალისტურ გამოძიებასთან დაკავშირებით გასტრონომი ავრცელებს ოფიციალურ განცხადებას,რომელშიც აცხადებს, რომ დასრულებული საბოლოო პროდუქტის დახლზე მოხვედრამდე მკაცრად კონტროლდება გასტრონომის ხარისხის კონტროლის სამსახურის მიერ.

მათი თქმით, გასტრონომისთვის შექმნილი რძის ნაწარმი ნედლი, პასტერიზებული რძისგან მზადდება და თითოეული პროდუქტი 100%-ით ნატურალურია.

"მომხმარებლების მაღალი ინტერესიდან გამომდინარე განვმარტავთ, რომ Gastronome-ის ნატურალური რძის პროდუქტები იწარმოება შპს "გეო ინდუსტრიის" კუთვნილ საწარმოში, სამეგრელოს რაიონის სოფელ მენჯში და არ აქვს კავშირი “ყვარლის ბაგასთან”.

Gastronome-სთვის შექმნილი რძის ნაწარმი ნედლი, პასტერიზებული რძისგან მზადდება და თითოეული პროდუქტი 100%-ით ნატურალურია. ფერმის ცხოველები იკვებებიან მხოლოდ ბალახითა და მარცვლეულით, რაც განაპირობებს ჩვენი ნაწარმის გემოვნურ და სასარგებლო თვისებებს.

პროდუქცია მდიდარია A, D და B ჯგუფის ვიტამინებით. წარმოების პროცესის ყველა ეტაპი - დაწყებული ცხოველების კვებიდან, დასრულებული საბოლოო პროდუქტის დახლზე მოხვედრამდე - მკაცრად კონტროლდება Gastronome-ის ხარისხის კონტროლის სამსახურის მიერ.საწარმო ფლობს HACCP სერტიფიკატს.

HACCP-ის პრინციპები მოითხოვს, რომ ორგანიზაციამ ჩამოაყალიბოს შედეგიანი სურსათის უვნებლობის სისტემა. იგი მიმართულია არა მხოლოდ საბოლოო პროდუქტის კონტროლზე, არამედ ბიოლოგიური, ქიმიური და ფიზიკური საფრთხეების წარმოქმნის წყაროების პრევენციაზე',- ნათქვამია განცხადებაში.

რადიო თავისუფლება ჟურნალისტურ გამოძიებას აქვეყნებს, რომელიც თანახმადაც, ბიზნესმენ ლაშა პაპაშვილის ნედლი რძის მწარმოებელი უდიდესი ფერმა ყვარლის ბაგა ძროხებს ევროკავშირში აკრძალული ქათმის ნაკელით კვებავდა. ის რძით ამარაგებდა სანტეს, სოფლის ნობათს, აგროჰაბს და რძის ლაბორატორიას.

გამოძიებაში საუბარია, თუ როგორ მოუგო ლაშა პაპაშვილის ყვარლის ბაგამ რევაზ ვაშაკიძის “ჩირინას” 4,7 მლნ ლარი. ლაშა პაპაშვილი ქართული ოცნების მხარდამჭერია. რევაზ ვაშაკიძე კი ქართული ოცნების მთავრობას აკრიტიკებს.

ჟურნალისტური გამოძიების მიხედვით, ლაშა პაპაშვილის ყვარლის ბაგამ სასამართლო დავა მოუგო ჩირინას (ბიუ-ბიუ), რომელსაც 4.7 მილიონის გადახდა დაეკისრა. გამოძიების თანახმად, 2018 წელს ყვარლის ბაგამ ჩირინასგან დაახლოებით 2 700 ტონა ქათმის ნედლი, გადაუმუშავებელი ნაკელი შეიძინა.

1 წლის თავზე, ყვარლის ბაგამ განაცხადა, რომ ჩირინაში ნაყიდმა სკინტლმა, რომელსაც ძროხებს აჭმევდა, საქონელი დაუხოცა და 1.65 მილიონი ლარის ზარალი მიიღო. ჩირინამ პრეტენზიები არ მიიღო და თქვა, რომ ქათმის ნაკელს სასუქად ყიდდა და არა - საკვებად.

2020 წელს ლაშა პაპაშვილის კომპანიამ ჩირინას სასამართლოში უჩივლა. მასალების მიხედვით, ყვარლის ბაგის 1 ძროხა დღეში დაახლოებით 6-7 კილო ქათმის ნაკელს ჭამდა (ნამჯაში არეულს).

როგორც საგამოძიებო მასალაში ვკითხულობთ, სანტემ მედიის კითხვებზე პასუხის გაცემა არ ისურვა. სოფლის ნობათში რადიო თავისუფლებას განუმარტეს, რომ ამ პერიოდის არქივი არ აქვთ, თუმცა, ჩვეულებრივ, მიღებულ პროდუქციას ამოწმებენ და საკუთარ სტანდარტებთან შეუსაბამობის შემთხვევაში, წარმოებაში აი იღებენ. აგროჰაბმა რადიო თავისუფლებას უთხრა, რომ იმ პერიოდში რძეს ყიდულობდნენ ყვარლის ბაგისგან, თუმცა არ იცოდნენ, რომ ძროხებს ნაკელს აჭმევდნენ.

რადიო თავისუფლების ჟურნალისტური გამოძიება სრულად.