60% ეთანხმება, რომ რუსული კანონი ქვეყნის დასავლურ მისწრაფებებს ძირს გამოუთხრიდა - IRI-ის კვლევა
საერთაშორისო რესპუბლიკური ინსტიტუტის (IRI) საზოგადოებრივი აზრის კვლევის მიხედვით, გამოკითხული მოსახლეობის უმრავლესობა რუსულ კანონს უარყოფითად აფასებს და მიიჩნევს, რომ კანონის მიღება ძირს გამოუთხრიდა საქართველოს დასავლურ მისწრაფებებს.
კერძოდ, გამოკითხული მოქალაქეები ეთანხმებიან, რომ:
- უცხოური აგენტების კანონის მიღება ძირს გამოუთხრის საქართველოს დასავლურ მისწრაფებებს - 42% (მტკიცედ), 18 (გარკვეულწილად)
- უცხოური აგენტების კანონის მიღება მიზნად ისახავს საქართველოს სამოქალაქო საზოგადოებისა და მედიის გაჩუმებას - 38% (მტკიცედ), 18% (გარკვეულწილად)
- უცხოური აგენტების კანონის მიღება საქართველოს აახლოებს რუსეთთან - 38% (მტკიცედ), 18% (გარკვეულწილად)
რაც შეეხება განცხადებას, რომ რუსული კანონის მიღება საქართველოს ეროვნულ ინტერესებშია, 13% ამას მტკიცედ ეთანხმება, ხოლო 40% - მტკიცედ არ ეთანხმება.
შეგახსენებთ, რომ მასშტაბური საზოგადოებრივი პროტესტის შედეგად ქართულმა ოცნებამ "უცხოური გავლენის გამჭვირვალობის შესახებ" რუსული კანონპროექტის გაწვევის შესახებ 9 მარტს განაცხადა, 10 მარტს კი პლენარულ სხდომაზე ჩააგდო. თავდაპირველად, ოცნება ამ კანონპროექტს მხარს უჭერდა და პარლამენტმა პირველი მოსმენით მიიღო.
IRI-ს კვლევის საველე სამუშაოები Polling & Marketing-მა ჩაატარა. მონაცემები შეგროვდა მთელი საქართველოს მასშტაბით 2023 წლის 4-დან 23 მარტამდე, პირისპირ ინტერვიუს მეთოდით. გამოიკითხა საქართველოს 1500 მოქალაქე 18 წლის ზემოთ, ვისაც ხმის მიცემის უფლება აქვს და ეს რაოდენობა გენერალური მოსახლეობის ჭრილში რეპრეზენტატულია ასაკის, სქესის, რეგიონის და დასახლების ზომის მიხედვით. გამოპასუხების მაჩვენებელმა შეადგინა 63%. ცდომილების ზღვარი ±2.5 პროცენტული პუნქტი. კვლევა დაფინანსდა აშშ-ს საერთაშორისო განვითარების სააგენტოს მიერ.
