ზელენსკი: წნეხი რუსეთზე კვლავ არასაკმარისია – აგრესორის თავდასხმები იზრდება

უკრაინის პრეზიდენტი ვოლოდიმირ ზელენსკი აცხადებს, რომ რუსეთის წინააღმდეგ არსებული საერთაშორისო წნეხი ჯერ კიდევ არასაკმარისია, ხოლო მისი ყოველდღიური იერიშები ამას მკაფიოდ ადასტურებს.

მისი თქმით, ბოლო ღამეს რუსეთის ძალებმა ბალისტიკური რაკეტებით და შაჰედის ტიპის დრონებით კიდევ ერთხელ დაარტყეს კიევსა და მის მიმდებარე რეგიონებს. იერიშების სამიზნე იყო მიკოლაივის, სუმის, ხარკოვის, ხმელნიცკისა და ჩერკასის ოლქებიც.

"რუსეთზე წნეხი კვლავ არასაკმარისია, და ამას ადასტურებს რუსეთის ყოველდღიური იერიშები უკრაინაზე. წუხელ ბალისტიკური რაკეტები გაუშვეს კიევზე, ხოლო დარტყმითი დრონები – კიევის რეგიონზე. იერიშები განხორციელდა მიკოლაივზე, სუმზე, ხარკოვზე, ხმელნიცკისა და ჩერკასის რეგიონებზე.

საჰაერო თავდასხმების რაოდენობა იზრდება. ეს არის რუსეთის ნამდვილი მიზნების გამოვლენა – შიშის თესვა მანამ, სანამ მსოფლიო ამას დაუშვებს.

მხოლოდ გასული კვირის განმავლობაში მტერმა გამოიყენა 1,460-ზე მეტი მართვადი საავიაციო ბომბა, თითქმის 670 დარტყმითი დრონი და 30-ზე მეტი რაკეტა სხვადასხვა ტიპის. გუშინ ღამით 20-ზე მეტი თავდასხმა განხორციელდა.

თითოეული დარტყმის სამიზნე იყო ჩვენი ხალხი, ჩვენი ბავშვები. ისინი ომს აწარმოებენ ბავშვების წინააღმდეგ, რომლებიც საბავშვო მოედნებზე თამაშობენ.

ვუსამძიმრებ დაღუპულების ოჯახებსა და საყვარელ ადამიანებს. მადლობას ვუხდი ჩვენს ყველა სამაშველო და სამედიცინო სამსახურს, რომლებიც გადაარჩენენ უკრაინელებს.

ეს იერიშები პუტინის პასუხია ყველა საერთაშორისო დიპლომატიურ ძალისხმევაზე. ყველა ჩვენს პარტნიორს — აშშ-ს, ევროპას და მთელ მსოფლიოს — ნათლად უნდა ესმოდეს, რომ რუსეთი აპირებს ომის გაგრძელებას და მკვლელობას.

ამიტომ წნეხის შემსუბუქება დაუშვებელია. ყველა ძალისხმევა უნდა იყოს მიმართული უსაფრთხოების უზრუნველყოფასა და მშვიდობის დაახლოებაზე", - წერს ზელენსკი.

ზელენსკის თქმით, მსოფლიო ვალდებულია, რეაგირება მოახდინოს კონკრეტული ნაბიჯებით და არა მხოლოდ მოწოდებებით.