შსს ვაგზალის მიმდებარე ტერიტორიაზე შენობის ჩამონგრევასთან დაკავშირებით, განცხადებას ავრცელებს

შინაგან საქმეთა სამინისტრო თბილისში, ვაგზლის მიმდებარე ტერიტორიაზე შენობის ჩამონგრევასთან დაკავშირებით, განცხადებას ავრცელებს.

უწყების განცხადებით, მეხანძრე-მაშველებმა შემთხვევის ადგილიდან ადამიანების ევაკუაცია განახორციელეს და ამ დროისთვის ტერიტორიის ნანგრევებისგან გაწმენდა და საძიებო-სამაშველო ღონისძიებები მიმდინარეობს.

"შინაგან საქმეთა სამინისტროს მიერ, თბილისში, „სადგურის მოედნის“ მიმდებარე ტერიტორიაზე მდებარე ერთ-ერთ საცხოვრებელ კორპუსში მომხდარი ნგრევის შესახებ შეტყობინების მიღებისთანავე, მოხდა საგანგებო სიტუაციების მართვის სამსახურის მეხანძრე-მაშველებისა და საპოლიციო ძალების მობილიზება.

ადგილზე მისვლისთანავე, მეხანძრე-მაშველებმა ჩამონგრეული შენობის მიმდებარე ტერიტორიიდან მყისიერად განახორციელეს მოქალაქეების ევაკუაცია.

მიმდინარეობს ტერიტორიის ნანგრევებისგან გაწმენდა და აქტიური საძიებო-სამაშველო ღონისძიებები. ადგილზე იმყოფებიან სასწრაფო სამედიცინო დახმარების თანამშრომლები", - წერია შსს-ის განცხადებაში.

შენობა ვაგზლის მიმდებარე ტერიტორიაზე რამდენიმე წუთის წინ ჩამოინგრა.

ამ დროისთვის, უცნობია დაშავებულთა რაოდენობა.

გავრცელებულ ვიდეოში ჩანს სისხლის ლაქებიც და სავარაუდოდ ადამიანის სხეულიც.