შსს-მ 298კგ "ჰეროინი" ამოიღო, რომლის ღირებულება დაახლოებით 85 მილიონი ლარია

ქართული ოცნების შინაგან საქმეთა მინისტრის მოადგილემ, ალექსანდრე დარახველიძემ ბრიფინგზე განაცხადა, რომ პოლიციამ 298 კილოგრამი "ჰეროინი" ამოიღო, რომლის ღირებულებაც ე.წ. შავ ბაზარზე დაახლოებით 85 მილიონი ლარია.

აღნიშნულ ფაქტთან დაკავშირებით საქართველოს 1 მოქალაქეა დაკავებული.

გამოძიებით დადგინდა, რომ სატვირთო ავტომობილი, რომელიც საბაჟო დოკუმენტაციის თანახმად, დატვირთული იყო ცეცხლგამძლე აგურით, საქართველოში სომხეთის რესპუბლიკიდან, საბაჟო გამშვები პუნქტ „გუგუთის“ გავლით შემოვიდა და ბათუმის გავლით ევროპაში უნდა გასულიყო.

სამართალდამცველებმა, გაფორმების ეკონომიკური ზონის ტერიტორიაზე, სატვირთო ავტომობილის მისაბმელის დეტალური შემოწმებისას, აგურის იმიტაციის მქონე პლასტმასის 600 კონტეინერი აღმოაჩინეს.

კონტეინერებში კი ფარულად მოთავსებული იყო 298 კილოგრამი ნარკოტიკული საშუალება "ჰეროინი", - თქვა დარახველიძემ ბრიფინგზე.

მომხდარზე გამოძიება სისხლის სამართლის კოდექსის 260-ე და 262-ე მუხლებით მიმდინარეობს.

დაკავებულს თავისუფლების 20 წლამდე, ან უვადო აღკვეთა ემუქრება.