საგანგებო: მტკვარში გადავარდნილი ავტომობილის 2 მგზავრის ცხედარი ნაპოვნია, 1-ს ეძებენ
საგანგებო სიტუაციების მართვის სამსახურის თანახმად, მაშველებმა მდინარე მტკვარში გადავარდნილი ავტომობილის ორი მგზავრის ცხედარი იპოვეს. მათივე ცნობით, გრძელდება ერთი ადამიანის ძებნა-შველის ოპერაცია.
"ცხედრები წყლიდან უკვე ამოასვენეს და მათ უტარდებათ ყველა შესაბამისი, სამართლებრივი პროცედურა. მდინარე მტკვრის ფსკერიდან ამოტანილია ავტომობილიც.
ერთი პიროვნების ძებნა-შველის ოპერაცია კი, უწყვეტ რეჟიმში გრძელდება.
სამაშველო ღონისძიებაში, მეხანძრე-მაშველებთან ერთად ჩართულები არიან მყვინთავთა ჯგუფი, წყლის საშუალებები და შინაგან საქმეთა სამინისტროს, შესაბამისი დანაყოფები.
შემოსული შეტყობინების მიღებისთანავე,მეხანძრე-მაშველების მიერ დაიწყო ძებნა-შველის ღონისძიება, რის შედეგადაც შესაძლებელი გახდა წყლიდან ერთი ადამიანის უვნებლად ამოყვანა", - ვკითხულობთ საგანგებო სიტუაციების მართვის სამსახურის განცხადებაში.
ამასთან, საგანგებოში აცხადებენ, რომ ძებნა-შველის ოპერაციის დროს, ასევე, ნაპოვნია მამაკაცის და ქალის ცხედრები, რომლებიც გადასვენებულია ექსპერტიზაზე.
