რუსეთი ბორის აკუნინის "უცხოეთის აგენტების" მუხლით გასამართლებას მოითხოვს

მოსკოვის პროკურატურა ითხოვს ახალი სისხლის სამართლის საქმის აღძვრას ცნობილი მწერლის, ბორის აკუნინის (გრიგორი ჩხარტიშვილი), წინააღმდეგ "უცხოელი აგენტის ვალდებულებების დაუცველობის" მუხლით.

პროკურატურის განცხადებით, აკუნინი უკვე ორჯერ დაჯარიმდა ადმინისტრაციული წესით "უცხოელი აგენტების" შესახებ კანონმდებლობის დარღვევისთვის. მიუხედავად ამისა, ის კვლავ ავრცელებს მასალებს მესენჯერებში შესაბამისი აღნიშვნის გარეშე, რომ ის "უცხოელი აგენტის" სტატუსს ატარებს.

ბორის აკუნინის დევნის ისტორია

• 2024 წლის იანვარში რუსეთის იუსტიციის სამინისტრომ ბორის აკუნინი „უცხოელ აგენტად“ გამოაცხადა.
• ამის შემდეგ რუსეთის საგამოძიებო კომიტეტმა მწერლის წინააღმდეგ სისხლის სამართლის საქმე აღძრა არმიაზე „ფეიკების“ გავრცელებისა და ტერორიზმის საჯარო გამართლების მუხლებით.
• მთავარი გამომცემლობა "AST"-მა შეწყვიტა აკუნინის წიგნების გამოცემა, ხოლო დიდმა წიგნის ქსელებმა მისი ნამუშევრები გაყიდვიდან ამოიღეს.
• როსფინმონიტორინგმა აკუნინი "ტერორისტებისა და ექსტრემისტების" რეესტრში შეიყვანა.

რუსეთში "უცხოელი აგენტების" კანონმდებლობა ხშირად გამოიყენება ხელისუფლების კრიტიკოსებისა და ოპოზიციურად განწყობილი საზოგადო მოღვაწეების წინააღმდეგ. ბორის აკუნინი ამჟამად უცხოეთში ცხოვრობს და აქტიურად გამოხატავს კრიტიკულ პოზიციას რუსეთის პოლიტიკის მიმართ.