პროკურატურა: სექსუალური ორიენტაციის ნიშნით შეუწყნარებლობის მოტივით ადამიანი მოკლეს

პროკურატურის ცნობით, თბილისში სექსუალური ორიენტაციის ნიშნით შეუწყნარებლობის მოტივით ადამიანი მოკლეს. უწყების ინფორმაციით, დამამძიმებელ გარემოებაში განზრახ მკვლელობის ბრალდებით ერთი პირია დაკავებული.

გამოძიების ვერსიით, დაკავებული და მოკლული ერთად ცხოვრობდნენ. სამართალდამცველებმა ბრალდებული 5 ოქტომბერს დააკავეს. მას ბრალდება სისხლის სამართლის კოდექსის 11'-109-ე მუხლის ე და კ ქვეპუნქტებით (სექსუალური ორიენტაციის ნიშნით შეუწყნარებლობის მოტივით განზრახ მკვლელობა, უმწეო მდგომარეობაში მყოფი, ოჯახის წევრის მიმართ) წარედგინა.

დანაშაული სასჯელის ზომად 16-დან 20 წლამდე ან უვადო თავისუფლების აღკვეთას ითვალისწინებს.

"პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს", - ნათქვამია განცხადებაში.