ლავროვი: კოლექტიური დასავლეთი საქართველოში ფერადი რევოლუციის მოწყობას ცდილობს

რუსეთის საგარეო საქმეთა მინისტრის სერგეი ლავროვის მტკიცებით, "კოლექტიური დასავლეთი პროვოცირებს შიდა კონფლიქტებს და საქართველოში ფერადი რევოლუციის მოწყობას ცდილობს".

რუსული პროპაგანდისტული და სამთავრობო მედია TASS-ის ცნობით, ამის შესახებ სერგეი ლავროვმა დსთ-ს ქვეყნების უსაფრთხოების და სადაზვერვო სამსახურების ხელმძღვანელთა რიგით მე-20 შეხვედრაზე ისაუბრა.

"კოლექტიური დასავლეთი პროვოცირებს შიდა კონფლიქტებს, დაძაბულობის კერებს, არც სხვადასხვა ბინძურ გეოპოლიტიკურ ტექნოლოგიებს უგულებელყოფს - დაწყებული მასშტაბური საინფორმაციო ომებით, დამთავრებული პირდაპირ ფერადი რევოლუციების ორგანიზებით, როგორც ახლა ამის გაკეთებას საქართველოში ცდილობენ", - ირწმუნება სერგეი ლავროვი.

სერგეი ლავროვი ასევე ირწმუნება, რომ დასავლეთი აქტიურად იყენებს "სამხრეთისა და გლობალური აღმოსავლეთის ქვეყნების შიდაპოლიტიკური სიტუაციის დესტაბილიზაციისთვის არასამთავრობო ორგანიზაციების ფართო ქსელს".