კოალიცია: მოვუწოდებთ ComCom-ს, იყოს დამოუკიდებელი, თავისუფალი სიტყვის დამცველი

მედიის ადვოკატირების კოალიცია განცხადებას ავრცელებს და აცხადებს, რომ კომუნიკაციების კომისიას აქვს არჩევანი ქართული ოცნების ინტერესების სამსახურსა და საკუთარ მისიას შორის, რაც დამოუკიდებელი, პოლიტიკური გავლენისაგან თავისუფალი მარეგულირებლის ფუნქციას გულისხმობს.

დღეს კომუნიკაციების ეროვნული კომისია ტელეკომპანია ფორმულასა და ტვ პირველის წინააღმდეგ ქართული ოცნების საჩივრებზე გადაწყვეტილებას 15:00 საათზე გამოაცხადებს.

კოალიცია მოუწოდებს ComCom-ს, იყოს დამოუკიდებელი და თავისუფალი სიტყვის დამცველი.

"კომისიას აქვს არჩევანი, დაიცვას ჟურნალისტური თავისუფლება საქართველოში.

ქართული ოცნება სხვადასხვა მეთოდით ცდილობს დამოუკიდებელი მედიის ხმის ჩახშობას. ტელეარხების პირველის, ფორმულას და მთავარი არხის წინააღმდეგ კომუნიკაციების კომისიაში შესული საჩივარი მედიის დაცენზურების ერთ-ერთი ხერხია.

საჩივრის თაობაზე მიღებული გადაწყვეტილება კომუნიკაციების კომისიამ დღეს უნდა გამოაცხადოს.

პარტია ტელევიზიებს ტერმინების გამოყენებას ედავება - ანუ, რეალობის აღწერას უკრძალავს.

კომისიამ უნდა გაითვალისწინოს, რომ:

• საზოგადოებრივი ინტერესი პოლიტიკური ძალების კრიტიკულ შეფასებაზე უფრო მაღალია.
• ქვეყანაში მიმდინარე მოვლენების საჯარო განხილვა დემოკრატიის საფუძველია და არა დასჯის საგანი.
• მედიას უნდა ჰქონდეს უფლება ქვეყანაში მიმდინარე პროცესებს შესაბამისი დახასიათება და შეფასება მისცეს. ეს არის ჟურნალისტიკის არსი.

მოვუწოდებთ კომისიას, იყოს დამოუკიდებელი და თავისუფალი სიტყვის დამცველი!", - ვკითხულობთ განცხადებაში.

***

კომუნიკაციების ეროვნულმა კომისიამ ქართული ოცნების საჩივრები ფორმულასა და ტვ პირველის წინააღმდეგ დასაშვებად 5 ივნისს ცნო.

ირაკლი კობახიძის წარმომადგენელი ფორმულასა და ტვ პირველს კომუნიკაციების ეროვნულ კომისიაში "მაუწყებლობის შესახებ" საქართველოს კანონის 54-ე, 59 პრიმა და 76-ე მუხლების დარღვევას ედავება.

კერძოდ, მოცემულია ტერმინები, რომლებიც ხაზს უსვამს ქართული ოცნების პარლამენტის, სხვადასხვა თანამდებობის პირებისა თუ ინსტიტუტების არალეგიტიმურობასა და პოლიტიკურ მიკერძოებას: "არალეგიტიმური პარლამენტი", "ეგრეთ წოდებული პარლამენტის თავმჯდომარე", "ოლიგარქის დეპუტატი", "რეჟიმის საქალაქო სასამართლო".

განსაკუთრებით ყურადღება ეთმობა ქართული ოცნების მთავრობის "რეჟიმად მოხსენიებას". საჩივარში მრავალჯერ მოიცავს ისეთ ტერმინებს, როგორიცაა "რეჟიმის პატიმარი," რეჟიმის წარმომადგენელი" და ა.შ.

ქართული ოცნება ფორმულას ბიძინა ივანიშვილის "ოლიგარქად" მოხსენიების გამოც უჩივის.

რა შეიძლება დაემართოს ფორმულას – "ოცნების" კანონით გათვალისწინებული რეალური სანქციები:

• გაფრთხილება

კომისიამ შეიძლება გამოუცხადოს ფორმულას ოფიციალური გაფრთხილება — საჯარო ან წერილობითი.

• დავალება შინაარსის გამოსასწორებლად

მაგალითად: ვალდებულება მოიხადოს ბოდიში, გააშუქოს დამატებითი პოზიციები, ან წაშალოს ზოგი შინაარსი საიტიდან/სოცქსელიდან.

• ფინანსური ჯარიმა

ჯარიმის ოდენობა კანონით შეიძლება იყოს საკმაოდ სოლიდურიც — მაგალითად, წინა პრაქტიკით, ზოგჯერ ირჩევა მაუწყებლის ბიუჯეტის შესაბამისი წილი.

• დროებითი რეგულაცია ან შეზღუდვა

სანამ საბოლოო გამოძიება დასრულდება, კომისიას შეუძლია მოსთხოვოს დროებითი შეზღუდვები – მაგალითად, მსგავსი ტერმინების გამოყენების შეჩერება.

• ლიცენზიის ჩამორთმევა

ფორმულას მიერ განმეორებითი მძიმე "დარღვევების" შემთხვევაში, კომუნიკაციების ეროვნულ კომისიას უფლება აქვს ფორმულას ლიცენზია შეუჩეროს ან გაუუქმოს.