ისრაელმა დამასკოში საჰაერო დარტყმა განახორციელა

ისრაელის თავდაცვის ძალებმა (IDF) სირიის დედაქალაქ დამასკოში საჰაერო დარტყმა განახორციელეს. მათ იერიში პრეზიდენტის სასახლის მახლობლად მიიტანეს.

იერიშის ფარგლებში დაიბომბა სირიის თავდაცვის სამინისტროსა და გენერალური შტაბის შენობა.

ისრაელის თავდაცვის მინისტრმა ისრაელ კაცმა X-ზე დაწერა: "ძლიერი დარტყმები დაიწყო".

სირიის მთავრობამ დაგმო ისრაელის თავდასხმა და განაცხადა, რომ "უმთავრესი პრიორიტეტი უსაფრთხოებისა და სტაბილურობის დაცვაა".

სირიის ჯანდაცვის სამინისტროს ცნობით, დამასკოში ისრაელის მიერ განხორციელებული დარტყმების შედეგად 1 ადამიანი დაიღუპა, 18 კი დაშავდა.

ისრაელის თავდასხმას გამოეხმაურა აშშ-ის სახელმწიფო მდივანი მარკო რუბიო და ჟურნალისტებთან საუბრისას თქვა, რომ ამერიკის შეერთებული შტატები შეშფოთებულია ამ საკითხით.

ამასთან, მან თქვა, რომ უკვე ესაუბრა შესაბამის მხარეებს და აღნიშნა, რომ აშშ-ს სურს, საბრძოლო მოქმედებები შეწყდეს.