ისრაელის ელჩი უკრაინაში: ისრაელში მიმდინარე ომი უკრაინის დახმარებაზე გავლენას არ მოახდენს
ისრაელის ელჩი უკრაინაში, მიხაელ ბროდსკი აცხადებს, რომ ისრაელში მიმდინარე ომი უკრაინის დახმარებაზე გავლენას არ მოახდენს.
"სამი კვირის წინ ისრაელზე საშინელი ტერორისტული თავდასხმა მოხდა, რის შედეგადაც 1400-ზე მეტი ისრაელელი და სხვა ქვეყნის მოქალაქეები დაიღუპნენ, 5000-ზე მეტი კი დაშავდა. ბოლო მონაცემებით, ღაზის სექტორში ტერორისტებს თითქმის 250 მძევალი ჰყავთ აყვანილი", - ამბობს ისრაელის ელჩი უკრაინაში.
მისი თქმით, ტერორისტული დაჯგუფება ჰამასის მხრიდან ისრაელზე თავდასხმის შედეგად 25 უკრაინის მოქალაქე დაიღუპა.
7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.
გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.
ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.
ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.
