ისრაელის არმია ღაზის სამხრეთით სახმელეთო ოპერაციას აფართოებს

ისრაელის არმია ღაზის სამხრეთით სახმელეთო ოპერაციას აფართოებს.

თავდაცვის ძალების ცნობით, ჰამასის ინფრასტრუქტურისა და მებრძოლების გასანადგურებლად შეტევას ხან-იუნისში იწყებენ. დაჯგუფების წევრები სამხედროებმა ქალაქის რამდენიმე უბანში შენიშნეს.

ამასთან, გაეროს ცნობით ღაზის ცენტრალური ნაწილი 150 000-მდე პალესტინელმა დატოვა. იქ ისრაელის არმია რეიდებს დევნილთა სამ ბანაკში ატარებს. ცეცხლი მოჰყვა გაეროს სააგენტოს დახმარების კოლონას, რომელიც ჩრდილოეთ ღაზიდან ბრუნდებოდა. შედეგად არავინ დაშავებულა, დაზიანდა 1 მანქანა.

7 ოქტომბერს ღაზის სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.

გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.

ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.

ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.