დიდ ბრიტანეთში ანტიტერორისტულ ოპერაციები ჩატარდა - დაკავებულია რვა პირი
დიდ ბრიტანეთში ჩატარებული ორი დამოუკიდებელი ანტიტერორისტული ოპერაციის შედეგად რვა კაცი დააკავეს, მათგან შვიდი ირანის მოქალაქეა.
ერთ შემთხვევაში, ლონდონის პოლიციის ანტიტერორისტული განყოფილების მიერ ჩატარებულ გამოძიებაში ხუთი პირი დააკავეს ინგლისის სხვადასხვა ქალაქში — მათ შორის სუინდონში, ლონდონში, სტოკპორტში, როჩდეილსა და მანჩესტერში. ოთხი მათგანი ირანის მოქალაქეა, მეხუთის ვინაობა ჯერ ზუსტდება.
დაკავებულები ეჭვმიტანილნი არიან ტერორისტული აქტის მომზადებაში. გამოძიების თანახმად, ისინი შესაძლოა კონკრეტულ ობიექტზე თავდასხმას გეგმავდნენ.
ცალკე გამოძიების ფარგლებში, ლონდონში კიდევ სამი ირანის მოქალაქე დააკავეს ეროვნული უსაფრთხოების კანონის საფუძველზე.
პოლიცია აცხადებს, რომ ორი გამოძიება ერთმანეთთან კავშირში არ არის.
ბრიტანეთის შინაგან საქმეთა მინისტრმა ივეტ კუპერმა აღნიშნა, რომ ეს მნიშვნელოვანი ოპერაციებია და გამოძიებას განსაკუთრებული მნიშვნელობა აქვს ქვეყნის უსაფრთხოებისთვის.
