აშშ უკრაინას ენერგეტიკული სისტემის აღსადგენად 522 მილიონ დოლარს გამოუყოფს

აშშ უკრაინას ენერგეტიკული სისტემის აღსადგენად 522 მილიონ დოლარს გამოუყოფს. ამის შესახებ ინფორმაციას გამოცემა Reuters ავრცელებს.

"უკრაინამ და შეერთებულმა შტატებმა ხელი მოაწერეს ურთიერთთანამშრომლობის მემორანდუმს, რომლის მიხედვითაც კიევი აშშ-სგან ქვეყნის ენერგეტიკული სისტემის აღსადგენად 522 მილიონ დოლარს მიიღებს.

[ამ გადაწყვეტილების მიღების] ერთ-ერთი მიზანია, დავეხმაროთ უკრაინას კრიტიკული ინფრასტრუქტურის აღდგენაში. მას შემდეგ, რაც რუსეთმა უკრაინაში არსებულ ელექტროსადგურებზე საჰაერო თავდასხმა განახორციელა, მილიონობით ადამიანი ზამთარში ელექტროენერგიის გარეშე დარჩა", - განაცხადა უკრაინაში აშშ-ის საელჩომ.

უკრაინის პრეზიდენტმა, ვოლოდიმირ ზელენსკიმ ყოველდღიური ვიდეომიმართვისას განაცხადა, რომ უკრაინამ აშშ-სგან არტილერია, ჭურვები, HIMARS-ის საბრძოლო მასალები, საჰაერო თავდაცვის რაკეტები, დამატებითი ჰაერსაწინააღმდეგო თავდაცვის სისტემები, ტაქტიკური მანქანები და კიდევ რამდენიმე ტიპის იარაღი მიიღო.