თამარა წულესკირი ითხოვს, წაშალონ Facebook-დან, ვინც ფიქრობს, რომ მისი ქმარი მოღალატეა

NATO-სა და ევროკავშირის საინფორმაციო ცენტრის დირექტორი თამარა წულეისკირი მიმართავს ყველას, დატოვონ მისი მეგობრების სია სოციალურ ქსელსა თუ რეალურ სივრცეში, თუ მის ქმარს, ლევან კობიაშვილს ქვეყნის მოღალატედ მიიჩნევენ.

ლევან კობიაშვილი ქართული ოცნებიდან ერთ-ერთია, ვინც რუსულ კანონპროექტს პირველი მოსმენით მხარი დაუჭირა.

"ჩემი "friend"-ების საყურადღებოდ (ამ სიტყვას გამიზნულად ვიყენებ, რადგან მისი უშუალო ქართული თარგმანი შინაარსობრივად ჩემთვის სრულიად სხვა დატვირთვის მატარებელია)! ჩემი ქმარი - ლევან კობიაშვილი! როცა რაღაცას არ ვეთანხმებით შეგვიძლია უმწარესად ვიკამათოთ, გავბრაზდეთ, შევიგინოთ კიდეც გამწარებულზე, გავაპროტესტოთ, გავაკეთოთ ჩვენი არჩევანი, შევაფასოთ როგორც გვინდა კონკრეტული საქციელი, გავიდეთ მიტინგზე, მოვითხოვოთ რაც გვინდა და სხვა. ჩემთვის ყველაფერი მისაღები და მეტიც, მისასალმებელია!

ყველაფერი! გარდა ერთისა - ყველამ, ვისაც არათუ დაგიწერიათ სიტყვა მოღალატე და ჩემი ქმრის სახელი ერთად, არამედ თუნდაც გიფიქრიათ ამ ორი სიტყვის შესახებ ერთ კონტექსტში, უმორჩილესად გთხოვთ, თავად, უკანმოუხედავად დატოვოთ ჩემი friend-ების სია სოც ქსელებში და ასევე ნაცნობის სტატუსი ფიზიკურ ფორმატში.

მსგავს თანადედამიწელებთან არათუ ევროპაზე, საერთოდ არაფერზე არაფერი მაქვს სასაუბრო. უბრალოდ აზრი არ აქვს!"- წერს წულეისკირი.

თამარა წულეისკირი NATO-სა და ევროკავშირის შესახებ საინფორმაციო ცენტრის დირექტორი 2019 წლიდანაა.