რუსეთის განცხადებით, ყირიმის თავზე უკრაინული დრონების თავდასხმა მოიგერიეს

რუსეთის თავდაცვის სამინისტრო უკრაინულ მხარეს მორიგ თავდასხმაში სდებს ბრალს და აცხადებს, რომ საჰაერო ძალებმა დროებით ოკუპირებული ყირიმის თავზე ორი დრონი ჩამოაგდეს.

"დღეს, დაახლოებით, 10:30 საათზე ჩაიშალა კიევის რეჟიმის მხრიდან მცდელობა, რუსეთის ფედერაციაში არსებულ ობიექტებზე ორი დრონით ტერორისტული თავდასხმა განეხორციელებინათ. ყირიმის რესპუბლიკის ტერიტორიაზე საჰაერო ძალებმა ორი უპილოტო საფრენი აპარატი გაანადგურეს", - აცხადებენ უწყებაში.

დღეს რუსულმა მხარემ გაავრცელა ინფორმაცია იმის შესახებაც, რომ მოსკოვთან ახლოს, ლიუბერცში უკრაინელების მორიგი იერიში მოიგერიეს - მოსკოვის მერის, სერგეი სობიანინის განცხადებით, გაანადგურეს დრონი, რომელიც დედაქალაქისკენ მიფრინავდა.