პრეზიდენტი: ოქტომბრის არჩევნებს ქვეყნის მომავლისთვის რეფერენდუმის მნიშვნელობა აქვს
პრეზიდენტის ადმინისტრაციის მიერ გავრცელებული ინფორმაციის მიხედვით დღეს გამართულ შეხვედრაზე სალომე ზურაბიშვილმა, სენატორმა ჯინ შაჰინმა და კონგრესმენმა მაიკ ტერნერმა საქართველოში არსებულ ვითარებაზე, ოქტომბრის არჩევნებზე ოკუპირებულ ტერიტორიებზე და მის მიმდებარედ არსებულ ტერიტორიებზე მიმდინარე მოვლენებზე და შავი ზღვის რეგიონის უსაფრთხოებაზე.
ადმინისტრაციის ცნობით, სენატორმა შაჰინმა და კონგრესმენმა ტერნერმა კიდევ ერთხელ დაადასტურეს აშშ-ის მხარდაჭერა საქართველოს სუვერენიტეტის და ევროატლანტიკური მისწრაფებების მიმართ.
მათ ასევე შეშფოთება გამოხატეს ქართული ოცნების ანტიდასავლური ქმედებებსა და რუსული კანონის მიღებასთან დაკავშირებით, რაც მათი თქმით. საქართველოს ევროპულ გზას მნიშვნელოვნად აზიანებს.
თავის მხრივ, პრეზიდენტმა სალომე ზურაბიშვილმა ხაზი გაუსვა, რომ ოქტომბერში გასამართ საპარლამენტო არჩევნებს საქართველოს ევროპული და დემოკრატიული მომავლისათვის გადამწყვეტი მნიშვნელობა აქვს. მისი თქმით, "ძალიან მნიშვნელოვანია, ქართველმა ხალხმა იგრძნოს აშშ-ის მხარდაჭერა."
"შეხვედრისას სენატორმა შაჰინმა და კონგრესმენმა ტერნერმა დაადასტურეს აშშ-ის ურყევი მხარდაჭერა საქართველოს სუვერენიტეტის, ტერიტორიული მთლიანობისა და ევროატლანტიკური მისწრაფებების მიმართ. მათ აღნიშნეს, რომ სპეციალურად ჩამოვიდნენ საქართველოში და ეს არ არის რეგიონული ვიზიტი. სწორედ იმის საჩვენებლად და დასადასტურებლად ჩამოვიდნენ, რომ ისინი დიდ მნიშვნელობას ანიჭებენ და მხარს უჭერენ საქართველოს დემოკრატიულ მომავალსა და განვითარებას. მათ ხაზი გაუსვეს, რომ საქართველოს და ქართველ ხალხს მუდამ ჰქონდათ და ექნებათ ორპარტიული მხარდაჭერა აშშ-ის მხრიდან, რაც მთლიანად ქვეყნის მხარდაჭერას ნიშნავს. მათ მაღალი შეფასება მისცეს პრეზიდენტის პირად ძალისხმევას საქართველოს ევროატლანიკური ინტეგრაციის გზაზე.
სენატორმა შაჰინმა და კონგრესმენმა ტერნერმა მწვავე შეფასება მისცეს მმართველი ძალის მიერ გადადგმულ ნაბიჯებს, როგორიც ,,რუსული კანონია“, რომელიც აზიანებს ქართულ დემოკრატიას, საქართველოს ევროპულ გზას და ორმხრივ ურთიერთობებს. მხარეებმა ხაზი გაუსვეს დამაზიანებელ ანტიდასავლურ რიტორიკას.
საუბარი ასევე შეეხო ოქტომბერში დაგეგმილ არჩევნებს. პრეზიდენტმა აღნიშნა, რომ ამ არჩევნებს საქართველოს ევროპული გზისა და დემოკრატიული მომავლისათვის რეფერენდუმის მნიშვნელობა აქვს. პრეზიდენტმა ზურაბიშვილმა ხაზი გაუსვა ამომრჩევლის მობილიზების მნიშვნელობას და გააცნო ქართული ქარტია, როგორც სამოქმედო გეგმა ევროპული რეკომენდაციების მოკლე ვადაში შესასრულებლად და ევროკავშირთან გაწევრიანების მოლაპარაკებების გახსნისათვის მნიშვნელოვანი ინსტრუმენტი. პრეზიდენტმა აღნიშნა, რომ ძალიან მნიშვნელოვანია, ქართველმა ხალხმა იგრძნოს აშშ-ის მხარდაჭერა. მხარეებმა ისაუბრეს მეგობარი აქტის მნიშვნელობაზე, ორმხრივი ურთიერთობების გაღრმავებისა და გაძლიერებისათვის.
შეხვედრისას განიხილეს ოკუპირებულ ტერიტორიებზე არსებული ვითარება, ოჩამჩირის პორტის საკითხი. სენატორმა შაჰინმა და კონგრესმენმა ტერნერმა განაცხადეს, რომ აპირებენ საოკუპაციო ხაზთან ჩასვლას", - აღნიშნულია პრეზიდენტის ადმინისტრაციის მიერ გავრცელებულ ინფორმაციაში.
