ოცნების პარლამენტის ე.წ. საგამოძიებო კომისიამ ნიკა მელიაც დაიბარა

ქართული ოცნების არალეგიტიმური, ერთპარტიული პარლამენტის "წინა ხელისუფლების საქმიანობის შემსწავლელ" ე.წ. საგამოძიებო კომისიაზე კოალიცია ცვლილებისთვის ერთ-ერთი ლიდერი ნიკა მელიაც დაიბარეს.

ამის შესახებ ის Facebook-ზე წერს და კომისიისგან მიღებულ შეტყობინებას აქვეყნებს.

"ბატონო ნიკანორ,

გაცნობებთ, რომ კომისიის მიერ მოთხოვნილია თქვენ მიერ ახსნა-განმარტების მიცემა 2004-2012 წლებში ადამიანის უფლებების დაცვის სფეროში არსებული ვითარებისა და, მომდევნო წლებში, შიდა და საგარეო პოლიტიკური პროცესების შესახებ, რისთვისაც მოწვეული ბრძანდებით მიმდინარე წლის 11 აპრილს, 13.00 საათზე.

აქვე შეგახსენებთ, რომ კომისიის წინაშე გამოცხადებაზე უარი წარმოადგენს სისხლის სამართლის დანაშაულს და ამგვარი ქმედება ისჯება საქართველოს კანონმდებლობით დადგენილი წესით.

პატივისცემით, საპარლამენტო კომისიის სამდივნოს ხელმძღვანელი ნინო ჭიპაშვილი", - ნათქვამია შეტყობინებაში.

დღეს ასევე ცნობილი გახდა, რომ ე.წ. საგამოძიებო კომისიის სხდომაზე კოალიცია ცვლილებისთვის კიდევ ორი ლიდერი - ნიკა გვარამია და ზურაბ ჯაფარიძე დაიბარეს.