ლუგელას ხეობის ტყის მასივში ხანძარია, ადგილზე მუშაობს 150-მდე მეხანძრე-მაშველი
საგანგებო სიტუაციების მართვის სამსახურის ცნობით, ჩხოროწყუს მუნიციპალიტეტში, ლუგელას ხეობაში, მთის ფერდობზე არსებულ ტყის მასივში ხანძარია - მათი განცხადებით, ხანძრის ლოკალიზების სამუშაოებს მეხანძრე-მაშველები ინტენსიურ რეჟიმში აწარმოებენ.
საგანგებოს განცხადებით, ხანძრის ქრობის პროცესში სპეციალური აღჭურვილობით 150-მდე მეხანძრე-მაშველი, დრონები და სასაზღვრო პოლიციის ორი ვერტმფრენია ჩართული. მათი თქმით, რთული რელიეფის გამო, ხანძრის კერასთან სახანძრო-სამაშველო ტექნიკის შეყვანა ვერ ხერხდება.
როგორც უწყებაში ამბობენ, მთელი ღამის განმავლობაში ადგილზე დარჩება ცოცხალი ძალა, რომელიც ტერიტორიის მონიტორინგს უწყვეტ რეჟიმში განახორციელებს.
