კურსკის ოლქში უკრაინელმა სამხედროებმა 20-ზე მეტი კადიროველი დაატყვევეს
უკრაინის შეიარაღებულმა ძალებმა კურსკის ოლქში დაახლოებით 20-ზე მეტი კადიროველი ტყვედ აიყვანეს. ინფორმაცია და კადრები უკრაინის შეიარაღებული ძალების პროექტმა - Хочу жить-მა 11 აგვისტოს გამოაქვეყნა.
ინფორმაციის თანახმად, დატყვევებული სამხედროები სპეცრაზმ - ახმატიდან არიან.
"რეიდერთა ჯგუფმა ეს კადიროველები საზღვრიდან ღრმა ზურგში გამოიჭირა. მათი თქმით, ცდილობდნენ გაქცეულიყვნენ, რათა ტყვედ არ ჩავარდნილიყვნენ, რადგან რამზან კადიროვმა ერთხელ თქვა, რომ ახმატის მებრძოლები ტყვედ არ ბარდებიან", - წერია ვიდეოს აღწერაში, რომელსაც Хочу жить აქვეყნებს.
ამ პოსტის გამოქვეყნებამდე ნახევარი საათით ადრე რამზან კადიროვი წერდა, რომ ახმატის მებრძოლებმა, საზღვაო ქვეითთა 810-ე ცალკეულ გვარდიულ ბრიგადასთან ერთად, უკრაინული ტექნიკის კოლონა და სამხედროები გაანადგურეს.
გავრცელებულ ვიდეოზე რამზან კადიროვს კომენტარი ჯერ არ გაუკეთებია. მანამდე ახმატის მეთაურმა აპტი ალაუდინოვმა უკრაინელების წარმატებაში კურსკის ოლქში რუსეთის თავდაცვის სამინისტროს "ზოგიერთი ხელმძღვანელი" დაადანაშაულა.
***
პირველი ცალკეული შეტყობინებები იმის შესახებ, რომ უკრაინის შეიარაღებული ძალები კურსკის ოლქში გადავიდნენ 6 აგვისტოს გაჩნდა.
კურსკის ოლქის ხელმძღვანელმა ალექსეი სმირნოვმა 7 აგვისტოს დილით განაცხადა, რომ რეგიონი "გმირულად ეწინააღმდეგება უკრაინელ ნაცისტებს".
6 აგვისტოს რუსეთის თავდაცვის სამინისტროში განაცხადეს, რომ სასაზღვრო რაიონის დასახლებებს ნიკოლაევო-დარინოსა და ოლეშნიას უკრაინის შეიარაღებული ძალების 300 სამხედრო დაესხა თავს, 11 ტანკისა და 20-მდე სამხედრო მანქანის დახმარებით. უწყებაში განაცხადეს, რომ ბრძოლების შედეგად უკრაინის 16 ერთეული ჯავშანტექნიკა გაანადგურეს. ამავე დღეს საღამოს კი სამინისტრომ განაცხადა, რომ უკრაინულმა დანაყოფმა, რომელიც კურსკის ოლქში შეჭრას ცდილობდა, უკან დაიხია. მოგვიანებით ეს განცხადება წაიშალა.
უკვე 7 აგვისტოს რუსეთის თავდაცვის სამინისტრომ განაცხადა, რომ ღამით რუსმა სამხედროებმა უსაფრთხოების ფედერალურ სამსახურებთან ერთად "განაგრძეს უკრაინის შეიარაღებული ფორმირებების განადგურება, რომლებიც უშუალოდ რუსეთი-უკრაინის საზღვარზე მიმდებარედ იყვნენ".
დღეს The Washington Post-მა გაავრცელა ინფორმაცია, რომ უკრაინამ კურსკის ოლქში 100 კვადრატული კილომეტრი დაიკავეს და ასობით რუსი სამხედრო დაატყვევეს.
