კობახიძე პრეზიდენტის წარმომადგენლებზე: სტუდენტები უყურებენ ამ ყველაფერს, თავის მოჭრაა

ქართული ოცნების თავმჯდომარე, ირაკლი კობახიძე საკონსტიტუციო სასამართლოში პრეზიდენტის წარმომადგენლებს აკრიტიკებს და აცხადებს, რომ მათ "გაუგონარი" არგუმენტები აქვთ. ის ამას "შემაშფოთებელს" უწოდებს და ამბობს, რომ "თავის მოჭრაა", რადგან სხდომებს სტუდენტებიც უყურებენ.

"სრული ნონსენსია, მართლა, მე ახლა ვფიქრობდი, რომ სტუდენტები უყურებენ ამ ყველაფერს, უბრალოდ თავის მოჭრაა, როდესაც სტუდენტები ხედავენ, რომ ასეთი ზრდასრული ადამიანები, იურისტები, ასეთ რაღაცებს ლაპარაკობენ ასეთ მარტივ თემასთან დაკავშირებით საკონსტიტუციო სასამართლოში. ეს არის შემაშფოთებელი და გამაოგნებელი. სუსტი არგუმენტები კი არ არის, გაუგონარია, გაუგონარ რაღაცებს ლაპარაკობენ", - განაცხადა კობახიძემ.

საკონსტიტუციოში პრეზიდენტის იმპიჩმენტის წარდგინების განხილვა ხვალ, 11:00 საათზე გაგრძელდება. მხარეები ხვალ კითხვებითა და დასკვნითი სიტყვით წარდგებიან. დღეს საკონსტიტუციო სხდომა სიტყვიერი დაპირისპირებების ფონზე წარიმართა.

ირაკლი კობახიძემ პრეზიდენტის წარმომადგენელს, მაია კოპალეიშვილს უთხრა, რომ "ეს ადეიშვილის სასამართლო" არ არის და "წესიერად" ესაუბრა.

მაია კოპალეიშვილმა კი კობახიძე უპასუხა, რომ ის იყო, ვინც საქართველოში გავრილოვი ჩამოიყვანა და პარლამენტის სავარძელში ჩასვა. "სამართლებრივ ჩარჩოებში იქნებ დავრჩეთ, მაცადეთ საუბარი, ერთი წამი", უპასუხა კობახიძემ კოპალეიშვილს.

ორი დღეა საკონსტიტუციო სასამართლოში პრეზიდენტის იმპიჩმენტის წარდგინების განხილვა მიმდინარეობს. საქმეს პლენუმი განიხილავს. პრეზიდენტი პროცესს არ ესწრება. მისი წარმომადგენლები კი თამარ ჩუგოშვილი და მაია კოპალეიშვილი არიან.

გადაწყვეტილების მისაღებად პლენუმს 2 კვირა აქვს. თუ საკონსტიტუციო სასამართლო სალომე ზურაბიშვილის მხრიდან კონსტიტუციის დარღვევას დაადგენს, პოლიტიკური პროცესი პარლამენტში გადაინაცვლებს.

პრეზიდენტის იმპიჩმენტისთვის საჭიროა პარლამენტის 2/3, ანუ 100 დეპუტატის ხმა. ამ ეტაპისთვის ქართულ ოცნებას საჭირო მხარდაჭერა არ აქვს.

პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".

30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.