აქციების დროს დაკავებული 11 პირის პროცესზე გდდ-ის სპეცრაზმელი ნუგზარ მირიანაშვილი დაიკითხა
თბილისის საქალაქო სასამართლოში, 30 ნოემბრის აქციებზე დაკავებული 11 პირის საქმეზე, შინაგან საქმეთა სამინისტროს განსაკუთრებულ დავალებათა დეპარტამენტის სპეცრაზმელი ნუგზარ მირიანაშვილი დაიკითხა, რომელსაც საქმეში დაზარალებულის სტატუსი აქვს.
მირიანაშვილის თქმით, ბრალდებულები არ იცნობს და მათ მიმართ პრეტენზიები არ გააჩნია. თუმცა აცხადებს, რომ თუ დადგინდება მათი მონაწილეობა ძალადობრივ ქმედებებში, „უნდა დაისაჯონ“.
"ბრალდებულებს არ ვიცნობ, არც ერთის მიმართ პრეტენზია არ გამაჩნდა, ვერც დაგიდასტურებთ და ვერც უარვყოფ, რომ მათი ნასროლი პიროტექნიკისგან დავზიანდი", - განაცხადა ნუგზარ მირიანაშვილმა.
მნიშვნელოვანი ეპიზოდები:
- მირიანაშვილი იხსენებს, რომ საღამოს 9:30-ზე მივიდა აქციის ადგილას და დაახლოებით 2 საათისთვის საავადმყოფოში გადაიყვანეს — დაზიანება მარჯვენა ტერფის არეში პიროტექნიკის აფეთქებამ მიაყენა.
- როგორც ამბობს, დაზიანდა მაშინ, როცა წყლის ჭავლის მანქანის წინ იდგნენ და ინტენსიური სროლა დაიწყო. მისი თქმით, რამდენიმე თანამშრომელიც დაშავდა, რაც ასევე პიროტექნიკის შედეგი იყო.
- მირიანაშვილი აღნიშნავს, რომ იქ მყოფ სპეცრაზმელებს პიროტექნიკის აფეთქებების დროს ხედვის არე მნიშვნელოვნად ეზღუდებოდათ — დაბალი განათება, აირწინაღი და ჩაფხუტის პლასტმასის ფარი ხელს უშლიდა მომხდარის ვიზუალურ აღქმაში.
- პროცესზე უფლებადამცველ ირაკლი ჩომახაშვილის კითხვაზე, ამოიცნობს თუ არა ვიდეოჩანაწერებში საკუთარ თავს, მირიანაშვილმა უპასუხა — „ვერა“.
მისი განცხადებების ძირითადი შინაარსი:
- უარყოფს, რომ მომიტინგეებთან ფიზიკური კონტაქტი ჰქონდათ
- ამბობს, რომ არც ცრემლსადენი გაზი გამოუყენებიათ
- არ დაუნახავს, პოლიციელებს თუ გადაჰყავდათ დემონსტრანტები აგრესიული გზით
- ასევე არ უნახავს, რომ სამართალდამცველები ქვებს ისროდნენ
- ამბობს, რომ მხოლოდ თავისი დავალების შესრულებით იყო დაკავებული – ეს იყო “ხაზის დაცვა”
ირაკლი ჩომახაშვილი:
– პოლიციას ამოიცნობთ ვიდეოში?
– მირიანაშვილი: „ვერა“.
– აბა, მომიტინგე როგორ დაინახეთ?
– „არ დამინახავს მომიტინგე, ვთქვი — მათ მხარეს აფეთქდა პიროტექნიკა“.
საქმე ეხება 2023 წლის 30 ნოემბრის აქციას, სადაც სამართალდამცველებსა და დემონსტრანტებს შორის შეტაკებები მოხდა.
პოპულარული სიახლეები
