Politico: ევროკომისია მუშაობს, რომ €200 მლრდ-ის გაყინული რუსული აქტივები უკრაინისკენ მიმართოს

ევროკომისია მუშაობს მექანიზმზე, რომელიც საშუალებას მისცემს თითქმის 200 მილიარდი ევროს ოდენობის გაყინული რუსული აქტივები გადაიტანოს სპეციალურ ფონდში და მიმართოს უკრაინის ომისშემდგომი რეკონსტრუქციისკენ.

ამის შესახებ Politico, რამდენიმე ევროპელ ოფიციალურზე დაყრდნობით იტყობინება.

კერძოდ, გამოცემა წერს, რომ ბრიუსელი ამოწმებს ეროვნული მთავრობების მზადყოფნას, გადაიტანონ აქტივები უფრო მაღალი რისკის ინვესტიციებში, რამაც შესაძლოა უკრაინისთვის მეტი შემოსავალი გამოიმუშაოს და ამავდროულად გაზარდოს ზეწოლა რუსეთზე.

მომხრეები ამ სქემას ასევე მიიჩნევენ, როგორც ნაბიჯს რუსული აქტივების პოტენციური კონფისკაციისა და უკრაინისთვის გადაცემისკენ, რაც ერთგვარი სასჯელი იქნება მოსკოვის მიერ ომის შემდგომი რეპარაციების გადახდაზე უარის თქმის გამო.

თუმცა, გეგმა არ ითვალისწინებს დაუყოვნებლივ კონფისკაციას, რასაც ევროკავშირის წევრი ქვეყნების უმეტესობა ფინანსური და იურიდიული მიზეზების გამო ეწინააღმდეგება.

როგორც გამოცემა იტყობინება, შაბათს, ეს საკითხი პირველად განიხილება ევროკავშირის 27 წევრი სახელმწიფოს საგარეო საქმეთა მინისტრების მიერ კოპენჰაგენში არაფორმალური შეხვედრის დროს.

„ჩვენ გვესმის, რომ ფულის მოზიდვა უფრო რთულია [ეროვნული ფინანსებიდან ან ევროკავშირის ბიუჯეტიდან]. ჩვენ გვაქვს ეს აქტივები და ლოგიკური კითხვაა, როგორ შეგვიძლია და რატომ არ ვიყენებთ ამ აქტივებს“, - განუცხადა Politico-ს ესტონეთის საგარეო საქმეთა მინისტრის მოადგილემ იურიდიულ და საკონსულო საკითხებში კერლი ვესკიმ.