ISFED: პროკურატურა 2024-ის არჩევნებზე PVT-ის დასკვნების დოკუმენტაციის გაგზავნას გვთხოვს

ორგანიზაცია სამართლიანი არჩევნები აცხადებს, რომ პროკურატურისგან მიიღეს წერილი, რომელშიც 2024 წლის საპარლამენტო არჩევნებზე ხმების პარალელური დათვლისა და მიღებული დასკვნებით დოკუმენტაციის გაგზავნას ითხოვენ.

ISFED-ის ცნობით, შესაბამის დოკუმენტაციას გააგზავნიან.

"საზოგადოების ინფორმირების მიზნით, გაცნობებთ, რომ საქართველოს გენერალური პროკურატურისგან „სამართლიანმა არჩევნებმა” მიიღო წერილი, რომლითაც უწყება ითხოვს 2024 წლის საპარლამენტო არჩევნებზე ხმების პარალელური დათვლისა და დათვლის შედეგად მიღებული დასკვნების ამსახველი სრული დოკუმენტაციის გაგზავნას. წერილის თანახმად, პროკურატურა ამ დოკუმენტებს ითხოვს 2024 წლის საპარლამენტო არჩევნების სავარაუდო გაყალბების საქმეზე მიმდინარე გამოძიების ფარგლებში. ორგანიზაცია გააგზავნის შესაბამის დოკუმენტაციას"- ნათქვამია განცხადებაში.